शेयर बजारको ओरालो यात्रा रोकिएन, आज साढे १९ अङ्कले घट्यो
बैशाख ६, २०८१ बिहिबार
काठमाण्डौ – प्रतिनिधि सभाअन्तर्गतकाे संसदीय समितिको विकास तथा प्रविधि समितिले शुक्रबार चाबहिल-जोरपाटी-साँखु सडक खण्डको स्थलगत अनुगमन गरेको हो ।
सभापति कल्याणी खड्काको नेतृत्वमा सांसदहरु, सडक आयोजनाका कर्मचारी तथा पत्रकारहरुसमेत सहभागी टोलीले सडक अनुगमन गरेको हो । सडक अनुगमनपछि सभापति कल्याणी खड्काले जिम्मेवारी भित्रको काम समयमै सम्पन्न गर्न ठेकेदार कम्पनीहरुलाई निर्देशन दिनुभयो ।
सडक अनुगमन गर्न आउने थाहा पाएपछि खाल्डो पुर्ने प्रवृति गलत भएको भन्दै जनतालाई कमजोर नठान्न श्रेष्ठले चेतावनी नै दिनुभयो । उहाँले भन्नुभयो, ‘बिरालोलाई लगेर तपाईँले ढोकामा थुनिदिनुभयो भने तपाईँको घाँटी च्याप्न आउँछ ।’
सभापतिको कडा निर्देशनपछि अनुगमनका क्रममा ठेकेदार कम्पनी, स्थानीय जनप्रतिनिधि र सडक विस्तार आयोजनाका प्रतिनिधिबीच आरोप प्रत्यारोप नै चल्यो । जनप्रतिनिधिले ठेकेदारले काम गर्न अटेरी गरेको र अनुगमन आउने थाहा पाएपछि सडकका खाल्डा पुर्ने काम गरेको बताए ।
ठेकेदार कम्पनीका प्रतिनिधिले भने स्थानीय जनप्रतिनिधिले बाटो विस्तारमा असहयोग गरेको गुनासो गरे । ठेकेदार कम्पनीका प्रतिनिधिले सडकको डिजाइन दिन ढिलाइ गरेका कारण समस्या भएको भन्दै सम्पूर्ण दोष आयोजना तर्फ थुपारेपछि आयोजना प्रमुखले प्रतिवाद गरेका थिए ।
चाबहिल–जोरपाटी सडक खण्डको निर्माण ठेक्का लिएका चार ओटा कम्पनीमध्ये लामा कन्स्ट्रक्सनका मालिक जिपछिरिङ लामा विकास समितिका सदस्य पनि हुनुहुन्छ । अनुगमनका क्रममा समितिले चाबहिल- मैजुबहाल र जोरपार्टी-साँखु सडक खण्ड दुरावस्थामा रहेको ठहर गरेको छ ।
कुन भूगोलमा कस्तो बाटो उपयुक्त छ भन्ने अध्ययन अनुसन्धानबिना नै सडक विस्तारको काम अगाडि बढाएकाले सडक निर्माण समयै सम्पन्न हुन नसकेको देखिएको सभापति खड्काले जानकारी दिनुभयो ।
प्रतिनिधिसभा बैठकमा राजधानीकै सडकको अवस्था नाजुक रहेको भन्दै दैनिकजसो सांसदहरुले आवाज उठाएपछि संसदीय समितिले त्यस तर्फ चासो देखाएको हो ।