काठमाण्डौ – सांसदहरुले एनसेल कर प्रकरणबारे न्यायालयले गरेको आदेशको छानबिन गर्नुपर्ने माग गरेका छन् ।

प्रतिनिधि सभाको मंगलबारको बैठकको शून्य समयमा बोल्दै सांसद मोहन बानिया र यज्ञराज सुनुवारले राजस्व असुलीका सम्बन्धमा न्यायालयले गरेको फैसला क्षेत्राधिकार बाहिरको भएको भन्दै स्पष्ट छानबिन हुनुपर्ने माग गर्नुभएको हो ।

सांसद मोहन बानियाले न्याय क्षेत्रबाट आफ्नो क्षेत्राधिकार मिच्ने काम भएको भन्दै क्षेत्राधिकार मिच्ने निकायलाई महाअभियोग लगाउनुपर्ने माग गर्नुभयो ।  उहाँले भन्नुभयो, ‘एनसेल राजश्व असुलीका सम्बन्धमा न्यायालयले नियम र कानुनलाई मिच्ने काम गरेको छ, सूर्यलाई हत्केलाले छेक्न खोज्ने निकायलाई कारबाही हुनुपर्छ र महाअभियोग प्रस्ताव पास गर्नुपर्छ ।’ 

यस्तै सांसद यज्ञराज सुनुवारले एनसेल प्रकरणमा न्यायालयको सम्मानका लागि पनि संसदले उसको आदेशको छानबिन गर्नुपर्ने बताउनुभयो ।  
विगतमा राज्यको गलत नीतिका कारण देश गरिब र व्यक्ति धनी बनेको भन्दै न्यायालयको पछिल्लो आदेश पनि व्यक्ति पोस्ने गरी आएकाले छानबिन हुनुपर्ने बताउनुभयो ।

त्यस्तै विशेष समयमा बोल्दै सांसद खगराज अधिकारीले एनसेलको लाभांश कर कुनै पनि अवस्थामा असुली हुनुपर्ने धारणा राख्नुभयो ।