सरकारले नै तिरेन गुठी संस्थानको अरबौँ रकम

 कात्तिक १७, २०७६ आइतबार १३:१८:३९ | उज्यालो सहकर्मी
unn.prixa.net

काठमाण्डौ – सरकारले नै गुठी संस्थानको भोगचलन गरेका जग्गाको अरबौँ रकम नतिरेको खुलासा भएको छ । 

गुठी संस्थानले आफ्नो ५६ औँ वार्षिकोत्सव कार्यक्रमको अवसर पारेर आइतबार काठमाण्डौमा सार्वजनिक गरेको वार्षिक प्रतिवेदनमा सरकारले आफ्नो कार्यालय र अन्य संघ-संस्थाका लागि जनकपुरमा मात्रै गुठीको एक सय ७० बिगाहाभन्दा बढी उपयोग गरे पनि त्यसको मात्रै १५ अर्बभन्दा बढी बहाल नदिएको उल्लेख गरिएको हो । 

कार्यक्रममा बोल्दै संस्थानका प्रशासक नारायण चौंधरीले सरकार र अन्य संघ-संस्थाहरुसँग गुठीको जग्गाको झण्डै १६ अर्ब ७२ करोड २५ लाख रुपैयाँ असुली गर्न बाँकी रहेको उल्लेख गर्दै असुलीका लागि सरकारसँग पत्राचार गर्ने निर्णय गरिएको पनि बताउनुभयो । 

प्रतिवेदनमा सरकारसँग अरबौँ रकम असुली हुन नसक्दा गुठी संस्थान सञ्चालनमा खर्च अभाव हुने अवस्था आएको उल्लेख गरिएको छ ।

गुठी संस्थानले आर्थिक वर्ष २०७६/०७७ को आय ६७ करोड ५७ लाख १४ हजार ८ सय र ५८ करोड ८२ लाख ५५ हजार ९ सय व्ययको पनि अनुमान गरेको छ । 

संस्थानका प्रशासक चौधरीले गुठी संस्थानको आर्थिक पारदर्शिताका लागि भन्दै भेटी संकलनको आधार, मापदण्ड तय गरी लागू गर्ने योजना पनि वार्षिक साधारण सभामा प्रस्तुत गर्नुभएको थियो । 

अन्तिम अपडेट: कात्तिक १८, २०७६

तपाईको प्रतिक्रिया