नर्वेले साढे चार अर्ब रुपैयाँ अनुदान दिने, प्रदेश २ को विद्युतीकरणमा खर्च हुने

 कात्तिक १८, २०७६ सोमबार २०:११:५८ | उज्यालो सहकर्मी
unn.prixa.net

काठमाण्डौ – प्रदेश २ मा विद्युतीकरण र आपूर्ति सुधारका लागि नर्वेले चार करोड अमेरिकी डलर अर्थात झण्डै साढे ४ अर्ब रुपैयाँ अनुदान दिने भएको छ ।

नर्वेले प्रदेश तथा स्थानीय तह शासकीय सुधार सहयोग कार्यक्रमअन्तर्गत उपलब्ध गराउने १० करोड डलरमध्ये प्रदेश दुईमा विद्युत् आपूर्ति सुधारका लागि चार करोड डलर खर्च हुने छ ।

अनुदान सम्झौतामा अर्थ मन्त्रालय सचिव राजन खनाल र नेपालस्थित नर्वेली राजदूत लास्से जोर्न जोहानेसेंले सोमबार हस्ताक्षर गर्नु भएको हो ।

नर्वेली सरकारले उपलब्ध गराउने अनुदान रकम प्रदेश–२ का जिल्लामा विद्युतीकरण र विद्युत् आपूर्तिलाई विश्वसनीय, गुणस्तरीय तथा भरपर्दो बनाउन खर्च गरिने नेपाल विद्युत प्राधिकरणका कार्यकारी निर्देशक कुलमान घिसिङले जानकारी दिनुभयो । 

‘अनुदान रकम प्रदेश २ को विद्युत् आपूर्ति सुधार तथा विस्तारका लागि ९ वटा नयाँ सबस्टेसन निर्माण, प्राविधिक चुहावट नियन्त्रण, विद्युतीय सुरक्षा, विद्युतीकरणलगायतमा खर्च हुने छ’, उहाँले भन्नुभयो, 'काम गर्न ठेकेदार छनोटका लागि तत्काल टेण्डर गरी काम सुरु गर्ने छौँ । २/३ वर्षभित्रमा काम सक्ने छौँ ।’ 

प्रदेश २ का ८ जिल्लामा ७९.७७ प्रतिशत विद्युतीकरण भएको छ । 

अन्तिम अपडेट: कात्तिक २४, २०७६

तपाईको प्रतिक्रिया