काठमाण्डौ - सरकारले एकै ठाउँमा धेरै मानिस जम्मा नहुन आग्रह गरेसँगै मस्जिदमा नमाज पढ्ने कार्यक्रम स्थगित भएको छ । कारोना भाइरस (कोभिड-१९) को सङ्क्रमणलाई मध्यनजर गर्दै मस्जिदमा नमाज पढ्ने कार्यक्रम स्थगित गरिएको हो ।

नेपाली जामे मस्जिद (धार्मिक स्थल) सञ्चालक समितिले सङ्क्रमणबाट बच्न शुक्रबारको विशेष नमाज लगायतका हरेक दिन हुने भिडभाड नगर्न आग्रह गरेको छ । 

'आफू पनि बाँचौ अरुलाई पनि बचाऔँ' भन्ने सन्देशसहित मस्जिदले सरकारले गरेको अनुरोधलाई ध्यानमा राख्दै सक्दो सहयाेग गर्न आग्रह गरेको छ । मस्जिदले आ-आफ्नो ठाउँबाट नमाज पढ्न अनुरोध गरेको छ । काेराेनाको जोखिमबाट बच्न सरकारले २५ जनाभन्दा बढी भेला नहुन आग्रह गरिसकेको छ । 

यसअघि बिहीबार संस्कृति पर्यटन तथा नागरिक उड्डयन मन्त्री योगश भट्टराईले धार्मिक गतिविधि सञ्चालनमा पुर्नविचार गर्न आग्रह गर्नुभएको थियो ।