कपिलवस्तु – कपिलवस्तुकी कोरोना सङ्क्रमित नर्स उपचारपछि घर फर्किनुभएको छ । कपिलवस्तु अस्पतालमा कार्यरत तौलिहवाकी २५ वर्षीया नर्स सङ्क्रमणमुक्त भएर आज घर फर्कनुभएको हो । उहाँमा वैशाख ३० गते पहिलो पटकको रिपोर्टमा पोजेटिभ आएपछि अस्पतालको आइसोलेशनमा राखिएको थियो । 

उहाँको दुई पटक जाँच गर्दा रिपोर्ट नेगेटिभ आएको स्वास्थ्य कार्यालयका कोरोना फोकल पर्सन कुमार थापाले बताउनुभयो । नेपालकै पहिलो कोरोना सङ्क्रमित स्वास्थ्यकर्मी उहाँले १४ दिनमै कोरोना जित्न सफल भएको पनि थापाले बताउनुभयो । घर पठाए पनि उहाँलाई थप एक हप्ता होम क्वरेण्टीनमा बस्न सुझाव दिइएको छ । 

कोरोना जितेर घर फर्किनुभएकी नर्सले खुसी व्यक्त गर्नुभएको छ । आइसोलेशनमा रहँदा आफूमा कुनै स्वास्थ्य समस्या नआएको र आफूले कुनै औषधि पनि सेवन गर्न नपरेको उहाँले बताउनुभएको छ । 

यसअघि कपिलवस्तु नगरपालिका तथा मायादेवी र यशोधरा गाउँपालिकाका तीन/तीन र बुद्धभूमि नगरपालिकाका एक जनालाई बुटवलको कोरोना विशेष अस्पतालबाट घर पठाइएको थियो । कपिलवस्तुमा ८३ जनामा कोरोना सङक्रमण देखिएको छ ।