काठमाडौं – मलेसियाको स्थानीय अंग्रेजी अनलाइन ‘द स्टार अनलाइन’ मा प्रकाशित समाचारप्रति नेपाली दूतावास मलेसियाले आपत्ति जनाएको छ । 

नेपाली कामदारसँग धेरै शुल्क लिने कार्यमा संलग्न मलेसियाको बेष्टिनेट कम्पनीले समस्या समाधानका लागि नेपाली दूतावाससँग छलफल गरेको र दूतावासले नेपाली कामदार पठाउने विषयमा लिइएको निणर्यका बारेमा पूनर्विचार नगरिने बताएको भनेर प्रकाशित समाचारप्रति दूतावासले आपत्ति जनाएको हो । 

समाचारमा बेष्टिनेटका प्रमुख कार्यकारी अधिकृत ईस्माली मोहम्मद नूरले समस्या समाधानका लागि मंगलवार नेपाली दूतावाससँग छलफल गरेको दावी गरेका छन् । दूई देशबीच सहमति भएपछि मात्रै समस्याको समाधान हुने दूतावासले बताएको समाचारमा उल्लेख गरेपनि कुनै छलफल नै नभएको भन्दै दूतावासले विज्ञप्ती मार्फत समाचारकाे खण्डन गरेकाे छ ।

समाचार झुठो भएको भन्दै दूतावाससँग सम्बन्धित विषयमा समाचार लेख्दा त्यस विषयमा दूतावाससँग एकपटक सोध्न मलेसियाका सबै सञ्चारमाध्यमलाई दूतावासले आग्रह पनि गरेको छ ।