काठमाण्डाै – प्रधानमन्त्री केपी शर्मा ओलीले रामको जन्मभूमि अयोध्या नेपालमा पर्ने भनेर अभिव्यक्ति दिएपछि यसको चर्को आलोचना भएको छ । भारत र देश भित्रैबाट समेत आलोचना भएको हो ।

प्रधानमन्त्री जस्तो व्यक्तिले बिना आधार र प्रमाण विवादास्पद अभिव्यक्ति दिएको भन्दै सामाजिक सञ्जालमा पूर्व प्रधानमन्त्री, मन्त्रीदेखि नेकपाकै नेता कार्यकर्तालेसमेत आलोचना गरेका छन् । भारतीय मिडियाहरुले यसैलाई प्रमुख विषय बनाएर प्रधानमन्त्री ओलीको आलोचना गरिरहेका छन् ।

यसैबीच भारतको सत्तारुढ दल भाजपाले प्रधानमन्त्री ओलीले विवादित अभिव्यक्ति दिएको भन्दै निन्दा गरेको छ । भाजपाका प्रवक्ता विजय शोनकर शास्त्रीले रामप्रतिको आस्थामा खेलवाड गर्न नहुने भन्दै प्रधानमन्त्री ओलीको आलोचना गरेका छन् । 

सोमबार भानुजयन्तीको अवसरमा बालुवाटारमा भएको कार्यक्रममा प्रधानमन्त्री ओलीले रामको जन्म नेपालको अयोध्यापुरीमा भएको तर भारतले साँस्कृतिक अतिक्रमण गरेको अभिव्यक्ति दिनुभएको थियो ।

याे पनि पढ्नुहाेस्

भारतले 'नक्कली अयाेध्या' खडा गरेर सांस्कृतिक तथ्यमाथि अतिक्रमण गर्‍याे : प्रधानमन्त्री

---