काठमाडाैं – आर आर क्याम्पसबाट सबै विद्यार्थी संगठनका बोर्ड हटाइएको छ । स्वतन्त्र विद्यार्थी युनियनको अगुवाइमा क्याम्पसभित्रका सबै बोर्ड हटाइएको छ भने क्याम्पस सफाई गरेर चिटिक्क पारिएको छ ।

"क्याम्पस भनेको पढ्ने र ज्ञान लिने  थलो हो, यहाँ विद्यार्थी संगठनका बोर्डले अलिक फोहोर पनि देखिएको थियो त्यसैले सबै संगठनका बोर्ड हटाएका हौं" आर आर क्याम्पसका स्ववियु सभापति तपेन्द्रजंघ शाहीले भन्नुभयो, "सुधार हामी आफैँले गर्ने हो, त्यसैले सरसफाई र अनुशासनसहित हामीले आर आर क्याम्पसलाई नमूना क्याम्पस बनाउने अभियानमा छौं ।" 

भदौ ४ गते क्याम्पस स्थापना दिवसको अवसरमा हुने कार्यक्रमलाई लक्षित गरेर स्ववियुले महानगरपालिकाबाट गाडी मगाएरै फोहोर ब्यवस्थापन गरेको हो । अब सफाई अभियानलाई नियमित बनाउने पनि सभापति शाहीले बताउनुभयो ।