साढे तीन सय वर्ष पुरानो मन्दिरको जिर्णोद्धार

 भदौ ४, २०७५ सोमबार १७:१:२ | पुरुषोत्तम गिरी
unn.prixa.net

सल्यान – प्रमुख व्यापारिक केन्द्र बनेको सल्यानको सितलपाटीमा रहेको रुद्रेश्वर मन्दिरको जिर्णोद्धार गरिएको छ ।

झण्डै ३ सय ५० वर्ष पुरानो रुद्रेश्वर शिवालय मन्दिरको जिर्णोद्धारपछि मन्दिरको मुहार नै फेरिएको छ । मन्दिर परिसरमा अहिले दर्शकहरु बस्न मिल्ने गरी पिढी निर्माण गरिएको छ भने मन्दिरमा गेट निर्माण, मन्दिर भित्र–बाहिर रंग रोगन, १ सय ८ पालाबत्ती तथा मन्दिरमा शिव लिंग राखिएको छ ।

मन्दिर व्यवस्थापन समितिका अध्यक्ष रामसिंङ बुढाथोकीको पहलमा पुरानो शिवालय मन्दिरको रंग रोगनपछि मन्दिरको मुहारै परिवर्तन भएको छ । बुढाथोकी मन्दिर व्यवस्थापन समितिको अध्यक्ष भएको झण्डै २ महिनामा नै यसरी मन्दिरको स्वरुप फेरिएको स्थानीयबासिन्दाको दाबी छ ।

मन्दिरमा रहेको एक शिलालेखका अनुसार मन्दिर वि.सं.१७३५ सालमा निर्माण गरिएको थियो । धार्मिक तथा ऐतिहासिक महत्वका दृष्टिले निकै महत्व बोकेको यस मन्दिरको मर्मत सम्भार तथा प्रचारप्रसार हुन नसकेका कारण मन्दिर ओझेलमा पर्दै आएको छ ।

यस क्षेत्र कै पुरानो मन्दिर भएकाले यस मन्दिरको मर्मत संभारको लागि आफूले व्यक्तिगत रुपमा ८० हजार रुपैयाँ भन्दाबढी रकम खर्च गरेको मन्दिर व्यवस्थापन समितिका अध्यक्ष बुढाथोकीले बताउनुभयो । उहाँले मन्दिरको व्यवस्थापन तथा संरक्षणमा कसैको पनि चासो नपुग्दा मन्दिरको प्रचारप्रसार हुन नसकेको गुनासो गर्नुभयो ।

‘यो शिवालय मन्दिर यस क्षेत्रकै पुरानो तथा महत्व बोकेको मन्दिर हो तर यसको सम्भारका लागी कसैले पनि खासै चासो देखाएको पाइँदैन्’, बुढाथोकीले भन्नुभयो, ‘अहिले आएर श्वेच्छाले केही स्थानीयले मन्दिरको लागि भनेर केही सहयोग गरे, तर यसका अलावा अन्य क्षेत्रबाट कुनै पनि सहयोग भएको छैन् ।’ 
 

अन्तिम अपडेट: कात्तिक २५, २०७५

पुरुषोत्तम गिरी

उज्यालोका सल्यान सहकर्मी पुरुषोत्तम गिरीलाई फेसबुकमा भेट्न सकिन्छ ।

तपाईको प्रतिक्रिया