वडाध्यक्षले धमाधम रसिद नै नकाटी महेन्द्र पार्कमा पैसा असुले

 भदौ ६, २०७५ बुधबार १९:०:५८ | गोविन्द शर्मा
unn.prixa.net

बाँके – मुस्लिम समुदायको महान पर्व बकर ईदको अवसर पारेर नेपालगञ्जस्थित महेन्द्र पार्कमा बुधबार सर्वसाधारणको बाक्लो भिडभाड भयो ।

सार्वजनिक बिदा भएका कारण अन्य समुदायका मानिस समेत पार्क घुम्न उपस्थित भएका थिए । तर महेन्द्र पार्कमा खटिएका कर्मचारीले एक जनाको पनि टिकट काटेका छैनन् । 

बुधबार नेपालगञ्ज उपमहानगरपालिका वडा नम्बर ८ का अध्यक्ष सुरेन्द्र गुप्ताले बिना रसिद पार्कमा प्रवेश गर्नेहरुबाट रकम संकलन गरेका छन् । वडा अध्यक्ष गुप्ताले स्थानीय सुरेन्द्र पण्डा जोशीलाई शुक्रबार बिहानैदेखि पार्कमा प्रवेश गर्नेसँग रकम संकलनका लागि खटाएका हुन् । साँझतिर वडा अध्यक्ष गुप्ता आफै आएर पैसा गनेर फर्केको प्रत्यक्षदर्शीले बताएका छन् । 

नेपालगञ्ज उपमहानगरपालिकाका मेयर डा. धवल शमशेर राणा र वडा अध्यक्ष गुप्ताको मिलेमतोमा अवैधरुपमा बिना रसिद रकम संकलन भएको भन्दै स्थानीय बासिन्दाले विरोध जनाएका छन् । राणा र बैश्य स्थानीय तहको चुनावमा राप्रपाबाट विजयी हुन् । महेन्द्र पार्क प्रवेशका लागि १० रुपैयाँको टिकटको व्यवस्था भएपनि बुधबार वडा अध्यक्ष गुप्ताको आदेशमा मूलगेटमा बिना टिकट १० रुपैयाँ असुली भएको छ । 

उपमहानगरपालिकाका कर्मचारी सुदामा सिंहले वडा अध्यक्षले संकलन गरेको रकमबाट साँझपख एकमुष्ट टिकट काटेर रकम जम्मा गरिने बताउनुभयो । तर बिना रसिद संकलन गरिएको रकम बुझाउँदा अनियमितता हुने स्थानीयको दावी छ ।
 

अन्तिम अपडेट: असोज १५, २०७५

गोविन्द शर्मा

बाँकेका उज्यालो सहकर्मी गोविन्द शर्मालाई फेसबुक र ट्विटरमा भेट्न सकिन्छ ।

1 Comments

  • josam chaudhary

    Aug. 22, 2018, 7:37 p.m.

    मेहनत बिनाको फल जति खाएपनि टिक्दैन , लोभी अध्यक्ष /

तपाईको प्रतिक्रिया