धनुषा – अज्ञात व्यक्तिले गोली प्रहार गर्दा एकजना गम्भीर घाइते भएका छन् । गोली लागेर लक्ष्मीनियाँ गाउँपालिका वडा नम्बर १ का ३५ बर्षिय संजय शर्मा गम्भीर घाइते हुनुभएको छ ।

दाहिनेतर्फ पेटमा गोली लागेको शर्माको जनकपुर अञ्चल अस्पतालमा उपचार सम्भव नभएपछि थप उपचारको लागि काठमाडौं लगिएको छ ।

सोमबार राति साढे ९ बजेको समयमा शर्मा दाजुभाई मोटरसाइकलमा जनकपुरबाट घर फर्किरहेको बेला जनकपुर ढल्केवर सडक खण्डको लक्ष्मीनियाँ बाजार नजिक अज्ञात व्यक्तिले गोली प्रहार गरेको प्रहरीले जनाएको छ । मोटरसाईकलमा आएका हतियारधारीले गोली प्रहार गरी फरार भएका छन् ।

घटनाका विषयमा अनुसन्धान भैरहेको र गोली प्रहार गर्ने व्यक्तिको खोजी भैरहेको धनुषाका प्रहरी उपरीक्षक गोविन्द थपलियाले जानकारी दिनुभयो ।