धनुषा – पूर्व–पश्चिम राजमार्ग अन्तर्गत धनुषाधाम नगरपालिका–९ धारापानीमा बुधबार बिहान १० बजे टिप्परले मोटरसाइकललाई ठक्कर दिँदा दुईजनाको घटनास्थलमै ज्यान गएको हो ।

पश्चिमबाट पुर्वतर्फ जादै गरेको ना १ प ६१८९ नम्बरको टिप्परले स ५ प ९०४६ नम्बरको मोटरसाइकललाई अभरटेक गर्ने क्रममा किचेको स्थानीय प्रत्यक्षदर्शीले बताएका छन् ।  

मृतकको अहिलेसम्म पहिचान भइसेकेको छैन । शवलाई पोष्टमार्टमकालागि जनकपुर अञ्चल अस्पतालमा ल्याउने तयारी भैरहेको ट्राफिक प्रहरी कार्यालय धनुषाले जनाएको छ । ठक्कर दिने टिप्पर र चालकलाई इलाका प्रहरी कार्यालय धारापानीले नियन्त्रणमा लिएको छ ।

यस अघि गएको साउन २६ गते जनकपुर ढल्केवर सडक खण्डमको महेन्द्र नगरमा बा ८ ख ११७० नम्बरको टिप्परले धनुषाधाम नगरपालिका– ५ नौ सय बिघाका २६ वर्षीय उमेश दासको ज्यान लिएको थियो ।
 
पछिल्लो समय धनुषामा टिप्पर आतंक बढ्दै गैरहेको छ । तीव्र गतिमा टिप्पर कुदाउँदा  सडकमा आवत–जावत गर्ने अन्य सवारी साधन र यात्रुहरुलाई आवागमन गर्नसमेत असहज हुने गरेको छ ।