काठमाडौं – प्रधानमन्त्री केपी शर्मा ओलीले  वर्तमान सरकारका मन्त्रीहरुले राम्रो काम गरिरहेको बताउनुभएको छ ।

जिल्ला समन्वय समिति महासंघ नेपालको प्रथम राष्ट्रिय भेलालाई उद्घाटन गर्दै प्रधानमन्त्री ओलीले मन्त्रीहरुकाे काम राम्राे भएकाे बताउनुभएको हो ।

‘सरकारका सबै मन्त्रीहरुले राम्रो काम गरिरहेका छन् । मन्त्रीमण्डल आजै परिवर्तन हुँदैछ, भोलि नै परिवर्तन हुँदैछ भन्ने हल्लाहरु हुन्’, प्रधानमन्त्री ओलीले भन्नुभयो, ‘मन्त्रीमण्डल अहिले परिवर्तन हुँदैन ।’

प्रधानमन्त्री ओलीले नेपालले अब चीनसँग आवश्यक हुने नाका प्रयोग गर्न सक्ने बताउनुभएको छ ।

‘नेपाल चीन प्रोटोकल सहमतिमा टुंगिएको छ’, प्रधानमन्त्री ओलीले भन्नुभयो, ‘अब नेपालले चाहिने जति नाका,चाहिने जति सडक प्रयोग गर्न पाउने भयो । यो असाधारण खुशीको कुरा हो ।’

प्रधानमन्त्री ओलीले राजनीतिक अधिकारको लडाईं सकिएकोले अब विकास र समृद्धिको यात्रामा सबै एकताबद्ध भएर लाग्नु पर्ने बताउनुभएको छ । प्रधानमन्त्री ओलीले सरकार नयाँ संकल्पका साथ अघि बढेको पनि स्पष्ट पार्नुभएको छ ।

‘मुलुकलाई विखण्डन तर्फ लैजाने प्रयास भएका छन् । मुलुकमा वितण्डा मच्चाउन खोजिएको छ’, प्रधानमन्त्री ओलीले भन्नुभयो, ‘हामीले विविधताका बीचमा उत्तिकै समानता खोज्नु पर्दछ । गलत तत्वहरुको चलखेललाई रोक्नु पर्दछ ।’

प्रधानमन्त्री ओलीले जिल्ला समन्वय समितिलाई प्रभावकारी ढंगले सञ्चालन गरिने बताउनुभएको छ । ‘मुलभूत रुपमा यसको काम जिल्ला भित्रका स्थानीय तहको समन्वय गर्ने हो’, प्रधानमन्त्री ओलीले भन्नुभयो, ‘यो काम प्रभावकारी ढंगले हेर्नुहोस । जिससको अधिकार तपाईंहरुको भूमिका,कार्यक्षमता,सक्रियताले स्थापित गर्ने हो ।’ संघीय सरकारले जिससलाई गर्ने सहयोगमा कुनै कमी नहुने प्रधानमन्त्री ओलीको भनाइ छ ।