काठमाडाैं - कृषि तथा पशुपंक्षी मन्त्रालयमा किसान पेन्सन योजना अलपत्र परेको छ ।

कृषि तथा पशुपंक्षी मन्त्री चक्रपाणि खनालले किसान पेन्सन योजना अघि बढाउन नसकिएको स्वीकार गरेसँगै याे योजना अलपत्र परेको हो ।

मंगलबार आफ्नो मन्त्रालयको ६ महिनाका मुख्यमुख्य उपलब्धिबारे जानकारी गराउन आयोजित पत्रकार सम्मेलनमा उहाँले त्यस योजनालार्इ अघि बढाउन आफू एक्लैले नसक्ने उल्लेख गर्दै त्यसका लागि प्रधानमन्त्री केपी ओली र अर्थ मन्त्री डा. युवराज खतिवडासँग आवश्यक छलफल गर्ने पनि बताउनुभयो ।

हरिबोल गजुरेल कृषिमन्त्री हुँदा यो योजना अघि सारिएको थियो । मन्त्री खनालले योजना अघि बढाउन राष्ट्रिय किसान आयोगलाई जिम्मेवारी दिइएको पनि बताउनु भयो । प्रधानमन्त्रीकै तहबाट निर्णय नभई किसान पेन्सन योजना अघि बढाउन नसकिने मन्त्री खनालको स्पष्टिकरण छ ।

मन्त्री खनालले ६ महिनाको अवधिमा मन्त्रालयले खाद्य स्वच्छता, कृषि व्यवसाय प्रवद्र्धन, बीउबीजन ऐनलगायतका एक दर्जनभन्दा बढी कानुन निर्माणको काम सम्पन्न गरिएको पनि जानकारी दिनुभयो ।