भोजपुर – व्यक्तिगत रिसिबीका कारण चिर्पट प्रहारबाट एक युवकको ज्यान गएको छ । 

षडानन्द नगरपालिका–५, आँपटारेका २७ वर्षीय मानबहादुर मगरले त्यसै ठाउँका २६ वर्षीय सुरेश राईलाई दाउराको चिर्पटले हानेर गम्भीर घाइते बनाएका थिए ।  उपचारका लागि अस्पताल लैजाने क्रममा बाटैमा राईको ज्यान गएको हो । 

‘पञ्च’ भनिने मानबहादुर मगरले व्यक्तिगत रिसिबीले राईमाथि मंगलबार साँझ करिब ६ बजेतिर चिर्पट प्रहार गरेका थिए । चिर्पट प्रहारबाट गम्भीर घाइते भएका राईलाई तत्काल तुम्लिङटारमा रहेको मनकामना अस्पताल लगिएको जिल्ला प्रहरी कार्यालय भोजपुरले जनाएको छ । 

गहिरो चोट लागेका राईको त्यहाँ अस्पतालमा उपचार हुन नसकेपछि धरानस्थित विपी कोइराला स्वास्थ्य विज्ञान प्रतिष्ठान लैजाने क्रममा बाटैमा ज्यान गएकोे जिल्ला प्रहरी कार्यालय भोजपुरका प्रहरी निरीक्षक चरित्रविक्रम कार्कीले बताउनुभयो ।

घटनाका आरोपी मगरलाई प्रहरीले पक्राउ गरेर अनुसन्धान सुरु गरेको छ ।