कालीकोट – तिलागुफा ६ जुविथाको नमूना भवन निर्माण सम्पन्न भएको छ । कालीकोटका स्थानीय तहमध्ये पक्की भवन भएको जुविथा पहिलो वडा बनेको छ । 

तिलागुफा नगरपालिकाको पहलमा बेलायती विकास नियोग डीएफआईडीको सहयोगमा ग्रामीण पुनर्निर्माण संस्था आरआरएनको प्राविधिक तथा सहजीकरणमा शौचालय, खानेपानीसहितको ३ तले १२ कोठे भूकम्प प्रतिरोधी पक्की भवन निर्माण भएको हो । 

कालीकोटको ९ वटा स्थानीय तहमध्ये तिलागुफा ६ को नयाँ भवन यहाँका प्रतिनिधि सभा सदस्य दुर्गाबहादुर रावत र प्रदेश सभा सदस्य कुर्मराज शाहीको उपस्थितिमा सीडीपीले नगरपालिकामार्फत वडापालिकालाई औपचारिकरुपमा भवन हस्तान्त्रण गरेको जिल्ला संयोजक लिलाराम न्यौपानेले बताउनुभयो । उहाँले स्थानीयले गाल्जेमा निःशुल्क जग्गा उपलब्ध गराएको र सीडीपीले १ करोड ६८ लाख को लागनीमा भवन निर्माण गरेको बताउनुभयो ।

सीडीपी परियोजनाले कालीकोटमा विद्यालय भवन, खानेपानी, सिंचाई कुलो, सामुदायिक भवन निर्माण लगायतका कार्य गरेको छ । सीपमूलक आयआर्जनका क्षेत्रमा पनि लगानी गरेको छ ।