काठमाण्डाै – सत्ता साझेदार दलहरूको बैठक अहिले बसिरहेको छ । प्रधानमन्त्री निवास बालुवाटारमा चलिरहेको बैठकमा प्रधानमन्त्री एवम् नेकपा एमालेका अध्यक्ष केपी शर्मा ओली, नेपाली कांग्रेसका सभापति शेरबहादुर देउवा, जनता समाजवादी पार्टीका अध्यक्ष अशोककुमार राई, लाेकतान्तिक समाजवादी पार्टीका अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ लगायतका नेताहरू सहभागी छन् ।

बैठकमा सरकारको कामको मूल्याङ्कन र न्यूनतम साझा कार्यक्रमबारे छलफल हुने प्रधानमन्त्रीको सचिवालयले जनाएको छ ।

हिजोको छलफलमा न्यूनतम साझा कार्यक्रम तय गर्न कांग्रेसबाट महामन्त्री गगन थापा र प्रकाशशरण महत तथा एमालेबाट उपमहासचिवद्वय प्रदीप ज्ञवाली र विष्णु रिमाल सदस्य रहेको कार्यदल बनाउने सहमति भएको थियो ।

गएको असार ३१ गते गठन भएको सरकारमा कांग्रेस र एमालेसँगै जनता समाजवादी, लोकतान्त्रिक समाजवादी र नागरिक उन्मुक्ति पार्टी सहभागी छन् । सरकारलाई जनता समाजवादी पार्टी नेपाल र जनमत पार्टीले पनि समर्थन गरेका छन् ।