रुसको कुर्स्क पुनर्निर्माणमा सहयोग गर्न उत्तर कोरियाले हजारौं कामदार पठाउने

असार ४, २०८२ बुधबार १५:१३:११ | एजेन्सी

उत्तर कोरियाले रुसको युद्धग्रस्त कुर्स्क क्षेत्रको पुनर्निर्माणमा सहयोग गर्न हजारौं कामदार पठाउने मस्कोका सुरक्षा प्रमुखले बताएका छन् ।

मङ्गलवार उत्तर कोरियाको राजधानी प्योङयाङमा उत्तर कोरियाका नेता किम जोङ उनसँग वार्ता गर्नुभएका रुसी सुरक्षा परिषद्का सचिव सर्गेई शोइगुले यो तैनाथीलाई भाइचारा सहयोग भनेर वर्णन गर्नुभएको रुसी सरकारी सञ्चारमाध्यमलाई उद्धृत गर्दै बीबीसीले जनाएको छ ।

छिमेकी दक्षिण कोरिया र जापानले यो योजनाको तुरुन्तै निन्दा गरेका खबरमा उल्लेख छ । दक्षिण कोरियाले उत्तर कोरिया र रुसबीचको निरन्तर अवैध सहयोगमा गम्भीर चिन्ता रहेको बताएको छ । यस्तै जापानले यी घटनाक्रमहरूले युक्रेनी अवस्थालाई बिगार्ने र आफ्नो देश वरपरको क्षेत्रीय सुरक्षा वातावरणलाई असर गर्ने बताएको छ ।

उत्तर कोरियाली सरकारी सञ्चारमाध्यमले बैठकमा किम र शोइगु दुवैले अन्य दीर्घकालीन योजनाहरूबारे पनि छलफल गरेका जनाएका छन् । यसअघि युक्रेनविरुद्धको रुसको युद्धलाई समर्थन गर्न उत्तर कोरियाले हजारौं लडाकू सेना र ठूलो मात्रामा परम्परागत हतियार आपूर्ति गरिसकेको छ ।

रुसी समाचार संस्था ‘तास’ ले शोइगुलाई उद्धृत गर्दै उत्तर कोरियाले कुर्स्क क्षेत्रको पुनर्स्थापनामा मद्दत गर्न निर्माणकर्ताहरूको एक डिभिजन, ५ हजार जनाको दुई सैन्य ब्रिगेडका साथै एक हजार जना डिमाइनर पठाउने बताएको छ ।

गएको वर्षको नोभेम्बरमा रुसले उत्तर कोरियासँग पारस्परिक रक्षा सन्धिमा हस्ताक्षर गरेको थियो ।

अन्तिम अपडेट: असार २४, २०८२

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्