लमजुङमा गायक प्रकाश सपूतको ‘दोहोरी ब्याटल’

 माघ २१, २०७५ सोमबार १३:३२:५८ | श्यामशितल परियार
unn.prixa.net

लमजुङ – चर्चित गायक प्रकाश सपूत र गायिका  कृष्णा गुरुङले लमजुङेलाई छमछमी नचाएका छन् । 

लमजुङको सुन्दरबजार नगरपालिका–८, डीडीसी खेल मैदानमा सञ्चालित प्रथम भोटेओडार महोत्सवमा आइतबार उनीहरुले आफ्नो गीत गाएर दर्शकलाई छमछमी नचाएका हुन् ।

महोत्सवमा गायक प्रकाश सपूतले ‘तोरी भएछ...,’ ‘माया भूल्ने...,’ ‘रेलीमई...,’ गीत गाउँदा दर्शक झुमेका थिए । उनले गीत गाउँदा दर्शकले नाचेर उनलाई साथ दिएका थिए ।

यसैगरी, उनले आफ्नो चर्चित गीत ‘बोल माया...,’ ‘चरर...बररर...’ बोलको गीत गाउँदा दर्शकदीर्घा भावुक बनेको थियो ।

जब गायक सपूतले ‘केटाहरु नबन सोझो, फुच्ची केटीहरुले निउँ खोजो...’ बोलको दोहोरी ब्याटल गाउन थाले । भावुक बनेका दर्शकहरु उफ्रीउफ्री नाच्न थालेका थिए । उनले दर्शककै भिडमा पुगी दोहोरी ब्याटल गाउँदै, नाच्दै, दर्शकलाई समेत नचाएका थिए । 

यसैगरी, गायिका कृष्णा गुरुङले ‘एक एक जोडे दुई हुन्छ...’, ‘मन परेको मान्छेको...’, ‘एकादशी बजारमा...’, ‘जाम भन्यो लाउरेले...’, लगायतका गीत गाउँदा दर्शक नाचेका थिए । महोत्सवमा आइतबार गायिका बाला दूरा, सुनिता अधिकारीलगायतले पनि आफ्नो प्रस्तुति राखेका थिए ।

महोत्सवमा लमजुङ, गोरखा, तनहुँ, कास्कीलगायतका ठाउँबाट दर्शकहरु ओइरिएको महोत्सव मूल समारोह समतिका संयोजक एवम् लमजुङ उद्योग वाणिज्य संघ भोटेओडार इकाईका अध्यक्ष सुरजकुमार श्रेष्ठले जानकारी दिनुभयो । 

माघ १८ गतेबाट सुरु भएको प्रथम भोटेओडार महोत्सव माघ २७ गतेसम्म चल्नेछ । स्थानीय पर्यटन र भोटेओडारको पहिचानको लागि महोत्सव सञ्चालन गरिएको पनि श्रेष्ठले बताउनुभयो । 
 

अन्तिम अपडेट: फागुन २९, २०८०

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया