आईपीएल क्रिकेट : सन्दीप लामिछाने सहभागी दिल्ली र हैदराबादकाे खेल आज

 चैत २१, २०७५ बिहिबार १०:१७:४९ | उज्यालो सहकर्मी
unn.prixa.net

आईपीएल क्रिकेटमा बिहीबार नेपाली युवा खेलाडी सन्दीप लामिछाने सहभागी दिल्ली क्यापिटल्स र सनराईजर्स हैदराबाद खेल्दैछन् । खेल नेपाली समय अुनसार दिल्लीको फिरोज साह कोट्ला मैदानमा राति सवा ८ बजेदेखि सुरु हुने छ । 

हैदराबाद जारी  प्रतियोगितामा उच्च फर्ममा देखिएको छ । उसले ३ खेलमा जित हात पारिसकेको छ । तर दिल्लीले २ खेलमा जित निकालेकाे छ भने २ खेलमा पराजित भएको छ । जसले गर्दा पछिल्लो खेलमा मजबुत स्थितिमा रहेको दिल्लीले लगातार गल्ती गर्दा पराजित हुन पुगेको थियो ।

मोहालीमा भएको खेलमा पञ्जाबसँग जित नजिक पुगेर पनि दिल्ली १४ रनले पराजित भएकाले याे खेलबाट पाठ सिकेर अघि बढ्नुपर्ने अवस्थामा छ । बिहीबारको खेलमा हैदराबादको मजबुत ब्याटिङ अर्डरविरुद्ध दिल्ली संयमित भएर खेल्नुपर्ने छ ।

बिहीबारको खेलका लागि दिल्लीका ब्याट्सम्यान शिखर धवनका लागि पनि महत्वपूर्ण रहेको छ । यसअघि हैदरबादबाट खेलेका शिखर यसै सिजन दिल्लीमा आवद्ध भएकाले पुरानो टिमविरुद्ध उनको पहिलो खेल हो । 

यसैगरी महेन्द्रसिंह धोनीलाई आइडल मान्ने दिल्लीका विकेटकिपर ऋषभ पन्तले पनि उत्कृष्ट प्रदर्शन गर्न  जरुरी छ । उनको गल्तिले पनि पछिल्लो खेलमा धेरै रन बनेको थियो भने विकेट पछाडि उनको प्रदर्शन फितलो नै रहेको थियो ।

हैदराबादमा जोन बेयरस्टो र डेभिड वार्नर दुवैले शतक प्रहार गर्दै विपक्षीलाई दबाब दिन सक्षम छन् । त्यसैले आजको खेलमा दिल्लीले वार्नरलाई रोक्ने रणनीति बनाउन जरुरी छ । 

हैदराबादसँग अफगानिस्तानका अफ स्पिनर मोहमद नवी र लेग स्पिनर रासिद खान छन् । उनीहरु जतिबेला पनि दिल्लीमाथि हावी हुन सक्ने क्षमता राख्छन् ।
 

अन्तिम अपडेट: फागुन ३०, २०८०

तपाईको प्रतिक्रिया