न्यूनतम साझा कार्यक्रम र सङ्कल्प प्रस्ताव ल्याउनु ठूलो कुरा होइन,...
चैत १५, २०८० बिहिबार
यूएई – नेपाली दूतावास यूएईले मजदुर क्याम्पमा जनचेतनामुलक कार्यक्रम सुरु गरेको छ ।
कामदार बस्ने क्याम्पमा वा कार्यस्थलमै पुगेर आफ्ना नागरिकलाई यहाँको कानुन तथा गर्न हुने र नहुने विषयमा जानकारी दिने उदेश्यले जनतेचनामुलक काम थालिएको दूतावासका नियोग उपप्रमुख सागरप्रसाद फुयाँलले जानकारी दिनुभयो ।
बुधवार साँझ आबुधाबीमा रहेको इमदाद गल्फ क्याटेरिङ्ग सर्भिसेस् कम्पनीको क्याम्पमा पुगेर त्यहाँ उपस्थित ४० जना नेपालीकाबीच दूतावासले कार्यक्रम गरेको छ।
यो कम्पनीमा झण्डै २ सय नेपाली कार्यरत रहेको र अहिलेसम्म कम्पनीमा समस्या नभएको कमदारले दूतावास प्रतिनिधिलाई बताएका छन् ।
पैसा कमाएर बचाउने र त्यसलाई सही ठाउँमा कसरी प्रयोग गर्ने, पैसा पठाउदा बैधानिक बाटो अपनाउनु पर्ने, कामदारलाई पर्ने समस्या र समस्या पर्दा अपनाउन सकिने उपायका विषयमा कार्यक्रममा छलफल गरिएको थियो ।
साथै रक्सी पिउँदा हुने जोखिम र यहाँको कानुन अनुसार पर्ने समस्याका बारेमा पनि कार्यक्रममा छलफल गरिएको श्रम सहचारी मोतिराम भुसालले बताउनुभयो ।
विदेश आउनुअघि अभिमुखीकरण तालिममा दूतावासको सम्पर्कमा रहिरहन भने पनि यूएई आएको १७ महिना हुँदा पनि एक पटक दूतावासको बारेमा सोधिखोजी नगरेको धादिङका रमेश त्रिपाठीले बताउनुभयो । ‘आफूले त दूतावासको खोजी कहिले पनि गरिएको थिइनँ, तर आज दूतावास आफैं हामीलाई खोज्दै आयो, खुशी लाग्यो,’ उहाँले भन्नुभयो ।
गएको वर्षदेखि दूतावासले कम्पनीका क्याम्पमै प्रत्यक्ष कामदारसँग सचेतनामुलक कार्यक्रम गर्दै आएको छ । यसरी गरिने कार्यक्रम थोरै बजेटमा धेरै ठाउँमा गर्न सकिने र सिधै कामदार समक्ष जानकारी पुग्ने भएकाले थप प्रभावकारी हुने दूतावासको विश्वास छ ।
उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।