रसुवा – गएको आइतबार दिउँसोबाट अवरुद्ध भएको रसुवागढी नाका जोड्ने सडक खुलाउनका लागि ब्लाष्टिङको काम सुरु भएको छ ।

राम्चे–धुन्चे सडक खण्ड अन्तर्गत पर्ने ब्राबलको सडक खुलाउनका लागि मंगलबार बिहानैदेखि ड्रिलिङको काम सुरु भएको प्रमुख जिल्ला अधिकारी अर्जुन भण्डारीले बताउनुभयो । उहाँका अनुसार मंगलबार बेलुकीसम्ममा सडक पूर्ण रूपमा खुलिसक्छ ।

सोमबार बेलुकी अस्थायी बाटो निर्माण गरेर साना ठूला सवारी पास गराइएको थियो । 

सडकको छेउ भासिएको छ भने भित्तातिर चट्टान छ । आइतबार दिनभरीको प्रयास विफल भएपछि कार्यालयले आइतबार साँझ ब्लाष्टिङको स्वीकृतिको लागि गृह मन्त्रालयमा पत्र पठाएको थियो ।

गृहले सोमबार बिहान रक्षा मन्त्रालयमा पत्र पठाएकोमा रक्षाले सेनालाई स्वीकृति प्रदान गरेको छ । मंगलबार साँझसम्ममा सडक खुलाउनका लागि सोमबार आवश्यक सामग्री तथा जनशक्ति तयार गरिएको उहाँको भनाइ छ ।