बसका चालकहरुलाई सुरक्षित यात्राको शुभकामनासहित फूलको माला र खादा

 असोज १२, २०७६ आइतबार १६:४०:५७ | उज्यालो सहकर्मी
unn.prixa.net

काठमाण्डौ – ट्राफिक प्रहरीले ‘सुरक्षित यात्राको शुभकामनासहित चालक सम्मान’ कार्यक्रम सुरु गरेको छ । 

ट्राफिक प्रहरीले आइतबार काठमाण्डौको नयाँ बसपार्कबाट दशैँका यात्रु बोकेर गएका बसका चालकहरुलाई सुरक्षित यात्राको शुभकामनासहित फूलको माला र खादा लगाएर सम्मान गरेको हो । 

चालकहरुलाई सुरक्षित यात्राको शुभकामनासहित सम्मान गर्दै प्रहरी महानिरीक्षक सर्वेन्द्र खनालले यात्रुहरुको सुरक्षित यात्राका लागि चालकहरुलाई अझै हौसला प्रदान होस् भन्ने उद्देश्यका साथ दशैंको अवसर पारेर शुभकामनासहित चालक सम्मान कार्यक्रम गरिएको स्पष्ट पार्नुभयो । 

चालकहरुको लापर्वाहीका कारण सडक दुर्घटनामा परि धेरैको ज्यान जाने गरेको जनगुनासो बढिरहेका बेला ट्राफिक प्रहरीले चालकहरुलाई सम्मान गरेर सुरक्षित यात्राका लागि थप हौसला प्रदान गर्न कार्यक्रमको शुभारम्भ गरेको हो । 

त्यस अवसरमा प्रहरी महानिरीक्षक खनालले यात्रुका लागि सधैँ भगवानको रुपमा रहेका चालकहरुले सुरक्षित ढंगले यात्रुहरुको यात्रा सफल बनाउने विश्वास व्यक्त गर्नुभयो । उहाँले कुनै पनि यात्रुले आफ्नो ज्यान गुमाउन नपरोस् भनि शुभकामना पनि व्यक्त गर्नुभयो । प्रहरी महानिरीक्षक खनालले चालक तथा सहचालकहरुले जिम्मेवारीपूर्वक सवारीसाधन चलाउन पनि सचेत गराउनुभयो ।

महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक (एसएसपी) भीमप्रसाद ढकालले नागरिकहरुको सुरक्षित यात्राको सुनिश्चितताका लागि प्रहरी प्रधान कार्यालयको निर्देशनमा दशैँ लक्षित ‘सुरक्षित यात्राको शुभकामना कार्यक्रम’ देशभर सञ्चालन गरिएको बताउनुभयो । उहाँले यस कार्यक्रमले नागरिकको सुरक्षामा पनि महत्वपूर्ण सहयोग पुर्‍याउने विश्वास व्यक्त गर्नुभयो ।

ट्राफिक प्रहरीले दशैंको पहिलो दिन आइतबारबाट सुरु गरेको यो अभियान देशभर तीन दिनसम्म सञ्चालन हुनेछ । महानगरीय ट्राफिक प्रहरी महाशाखाले सुरक्षित यात्राका लागि चालक तथा सहचालकहरुलाई तनावमा आउने खालको कुनै पनि गतिविधि नगर्न यात्रुहरुलाई पनि आग्रह गर्दै आएको छ । 

अन्तिम अपडेट: माघ ३०, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया