काठमाण्डौ – नेपाल पत्रकार महासंघले रेडियो नेपालबाट बर्खास्त गरिएका पत्रकारहरुको पुनर्वहाली गर्न सरकारसँग माग गर्दै सडक आन्दोलन सुरु गरेको छ ।

नेपाल पत्रकार महासंघको आह्वानमा सोमबार रेडियो नेपालबाट बर्खास्त गरिएका पत्रकारहरुको तत्काल पुनर्वहाली गर्न सरकारसँग माग गर्दै काठमाण्डौको नयाँ बानेश्वरमा धर्ना दिइएको हो ।

१० वर्षसम्म रेडियो नेपालमा कार्यरत पत्रकारहरुको पुनर्वहालीको माग गर्दै सडक आन्दोलन सुरु गर्नु परेको महासंघका अध्यक्ष गोविन्द आचार्यले जानकारी दिनुभयो । महासंघले सरकारले तत्काल आफूहरुको मागको सुनुवाइ नगरे कडा आन्दोलनमा जान बाध्य हुने चेतावनी पनि दिनुभयो ।

अध्यक्ष आचार्यले न्यूनतम पारिश्रमिक पूर्ण रुपमा लागू गराउन पनि सरकारलाई पटकपटक सचेत गराउनुभयो ।

रेडियो नेपाल प्रदेश प्रसारण केन्द्र दिपायलबाट बर्खास्त गरिएका डोटीका पत्रकारहरु सुनिता रावल, प्रकाश बम र चक्र कुँवरको पुनर्वहाली गर्न सरकारसँग माग गर्दै रेडियो नेपाल, नेपाल पत्रकार महासंघ प्रतिष्ठान शाखाले पनि आन्दोलन गर्दै आएको छ ।