नवलपरासी – पूर्व–पश्चिम राजमार्गअन्तर्गत नवलपरासीको दाउन्नेमा ट्रक ठोक्किएर पल्टिँदा यातायात सञ्चालनमा कठिनाइ भएको छ ।

विनय त्रिवेणी गाउँपालिका–२, दाउन्नेको विश्वकर्मा मन्दिर नजिक बिहीबार राति ९ बजे दुई वटा भारतीय ट्रक एक आपसमा ठोक्किँदा दुईतर्फी  नै यातायात अवरुद्ध भएको थियो । जसका कारण अहिले पनि दाउन्ने क्षेत्रमा दुवैतर्फ झण्डै पाँच–पाँच किलोमिटर गाडीको लाम लागेको छ । यूपी ५३ सी टी ९३२६ र यूपी ५३ जेजे १२३९ नम्बरको भारतीय ट्रक एकापसमा ठोक्किएका हुन् ।

दुर्घटनामा परेको एउटा ट्रकलाई सडकबाट हटाइए पनि २२ चक्के यूपी ५३ जेजे १२३९ नम्बरको  ट्रक सडक छेउमै हुँदा यातायात सञ्चालनमा कठिनाइ भएको छ । अहिले एकतर्फी रुपमा सवारी सञ्चालन गरिएको छ । तर सडकमा यातायातको चाप धेरै हुँदा दुवैतर्फ गाडीको लामो लाइन लागेको छ । एकतर्फी रुपमा गाडी सञ्चालनका लागि समेत दुर्घटनामा परेको ट्रकका कारण समस्या भएको छ ।

दुर्घटनामा परेको कोइला बोकेको  २२ चक्के भारतीय ट्रक सडक छेउको नालामा खसेको छ । ट्रकलाई राति नै के्रनको सहायताले हटाउन खोजे पनि सफल भएन ।

अहिले थप के्रन मगाएर दुई वटा क्रेनले तान्ने योजना गरिएको  इलाका प्रहरी कार्यालय दुम्किबासका प्रमुख  अविनास अधिकारीले बताउनुभयो । चाडबाडको समयमा लामो जाममा पर्दा यात्रुहरुलाई समस्या भएको छ ।  सडकको जाम खुलाउन समय लाग्ने प्रहरीले जनाएको छ ।