फ्रान्सेली प्रशिक्षक डेसच्याम्पको कीर्तिमान

 असार ३१, २०७५ आइतबार २३:२७:५३ | एजेन्सी
unn.prixa.net

२० वर्षको अन्तरमा तेस्रो पटक विश्वकपको फाइनल पुगेर दोस्रो उपाधि जितेको फ्रान्सका प्रशिक्षक डिडिएर डेसच्याम्पले अर्को कीर्तिमान रचेका छन् । 

आज भएको फाइनलमा क्रोएसियालाई हराएसँगै उनी खेलाडी र प्रशिक्षक दुवैको भूमिकामा गोल गर्ने तेस्रो व्यक्ति बनेका छन् । 

सबै राम्रा खेलाडी राम्रा प्रशिक्षक बन्न सक्दैनन् भनिन्छ । तर, त्यस उक्तिमा उनी अपबाद बनेका छन् ।

सन् १९९८ मा घरमै भएको विश्वकपको ट्रफी डेसच्याम्पले उचालेका थिए । डिफेन्सिभ मिडफिल्डका उच्चस्तरीय खेलाडी डेसच्याम्प अहिले प्रशिक्षकका रुपमा फ्रान्सलाई दोस्रो विश्वकप उपाधि दिलाउन सफल भएका छन् । 

४९ वर्षीय डेसच्याम्प सन् १९९८ मा फ्रान्सले पहिलो पटक विश्वकप जित्दा टोलीका कप्तान थिए । उनको नेतृत्वमा साविक विजेता ब्राजिललाई फाइनलमा ३–० ले हराएर फ्रान्सले इतिहास कायम गरेको थियो ।

विश्वकपको बीसौं संस्करणसम्म केवल दुई व्यक्तिले यो सफलता हात पारेका थिए, ब्राजिलका मारियो जागाल्लो र जर्मनीका फन्स बेकनबउरले खेलाडी र प्रशिक्षकका रुपमा विश्वकपको ट्रफी उचालेका थिए ।

जागाल्लोले १९५८ र १९६२ मा खेलाडी र १९७० मा प्रशिक्षकका रुपमा ब्राजिलका लागि विश्वकप उपाधि जितेका थिए । यस्तै १९७४ मा खेलाडीका रुपमा विश्वकप जितेका बेकनबउरले प्रशिक्षक बनेर १९९० मा जर्मनीलाई उपाधि दिलाए ।

    

अन्तिम अपडेट: चैत ७, २०८०

तपाईको प्रतिक्रिया