इलाममा पछिल्ला ६ वर्षमा बालिका बलात्कारका घटना सबैभन्दा बढी

पुष ८, २०७६ मंगलबार १४:३३:४ | सुजता सुनुवार

इलाम – इलाममा अपराधिक घटनामा सबै भन्दा बढी बालिका बलात्कारका घटना भएको पाइएको छ ।

जिल्लामा ६ वर्षमा सात सय ३९ वटा अपराधिक घटना भएका छन् । जसमध्ये बालिका बलात्कारका घटना मात्रै ९७ वटा रहेको अनौपचारिक क्षेत्र सेवा केन्द्र (इन्सेक) इलामले जानकारी दिएको छ ।

सोमबार इन्सेक इलामले ‘मानव अधिकार वर्ष पुस्तक–२०२०’ का लागि गरेको वार्षिक पूर्वसमीक्षा तथा मानव अधिकार अवस्था विषयको अन्तरक्रिया कार्यक्रम मार्फत उक्त तथ्याङ्क सार्वजनिक गरिएको हो ।

इन्सेक इलामकी जिल्ला प्रतिनिधि कोकिला ढकालका अनुसार ६ वर्षभित्र इलाममा आत्महत्याका तीन सय १८, घरेलु हिंसाका दुई सय १६, बलात्कारका एक सय ३५, बहुविवाहका ३८, बालक कुटपिटका १० घटना भएका छन् । यस्तै हत्या र मानव ओसारपसार तथा बेचबिखनका आठ-आठ, बेवास्ता, बालविवाह र जातीय विभेदका दुई÷दुईवटा घटना घटेको उहाँले जानकारी दिनु भयो ।

यस्तै ६ वर्षमा सबै भन्दा बढी सन् २०१७ मा मानव अधिकार उल्लङ्घनका घटना घटेको प्रतिवेदनमा उल्लेख छ । यस वर्ष एक सय ७८, सन् २०१५ मा एक सय ५८, सन् २०१६ मा एक सय ४९, सन् २०१८ मा एक सय २०, सन् २०१४ मा ७९ र सन् २०१९ मा ३३ वटा घटना घटेको प्रतिनिधि ढकालले बताउनु भयो । यस वर्ष भने सबै भन्दा कम घटना भएको पाइएको छ ।

यस्तै प्रतिवेदनको तथ्यांक अनुसार सन् २०१९ मा ३३ वटा मानव अधिकार उल्लंघनका घटना घटेका छन् । जसमा सबैभन्दा बढी बलात्कारका घटना रहेका छन् । यस वर्ष बालिका १३ र महिला आठ गरी बलात्कारका २१ वटा घटना भएका छन् । यसैगरी बहुविवाहका आठ, हत्याका तीन र बालविवाहको एउटा घटना भएको छ ।

देशको मानव अधिकारको अवस्था झल्कने गरी इन्सेकले बर्सेनि मानव अधिकार वर्ष पुस्तक प्रकाशन गर्दै आएको छ । हिंसा र अपराधसँग जोडिएका घटनालाई पनि पछिल्लो समय मानव अधिकारसँग जोडेर हेर्ने गरिएको मानव अधिकार मञ्चका मोहन थेवेले बताउनु भयो ।

जस्तोसुकै घटना होस् घटनाका दोषीलाई कोही कसैले कुनै पनि हालतमा संरक्षण गरेर राख्न नहुनेमा समीक्षा कार्यक्रमका सहभागीहरुले जोड दिएका थिए । घटनालाई न्यूनीकरण गर्न र मानव अधिकारको रक्षा गर्न सबैले हातेमालो गर्नुपर्ने सहभभागीहरुको भनाई थियो ।

कार्यक्रममा विभिन्न सरोकारवाला, राजनीतिक दलका प्रतिनिधि, संघसस्था तथा सरकारी कार्यलयका प्रतिनिधि र सञ्चारकर्मी लगायतको सहभागिता रहेको थियो ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुजता सुनुवार

सुजता सुनुवार उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्