पशुपति क्षेत्रमा स्वीकृतिबिना राखिएका पूजा सामग्री लगायतका पसल हटाइने

 माघ २, २०७६ बिहिबार ९:३७:५७ | उज्यालो सहकर्मी
unn.prixa.net

काठमाण्डाै – पशुपति क्षेत्रका विभिन्न ठाउँमा स्वीकृतिबिना राखिएका पूजा सामग्रीलगायतका पसल हटाइने भएको छ ।

पशुपति क्षेत्र विकास कोषले सार्वजनिक सूचना निकालेर एक हप्ताभित्र पशुपति क्षेत्रका वनकाली, भकुण्डोल, मृगस्थली, कैलाश डाँडा, गुह्येश्वरीलगायत क्षेत्रमा राखिएका पसल हटाउन निर्देशन दिएको छ ।

स्वीकृति नलिइ राखिएका पसलले पशुपति क्षेत्र आउने पर्यटकलाई असहज भएको, पवित्र धार्मिकस्थलको सौन्दर्यमा कमी आएकाले हटाउन निर्देश गरिएको कोषले जनाएको छ ।

पञ्चदेव पछाडिका २६ पसलले मात्र स्वीकृति लिए पनि झण्डै दुई सय पसल टहरामा सञ्चालन गरिएको छ । जसले तीर्थयात्री एवं पर्यटकलाई हिँडडुलमा असजिलो भएको कोषले जनाएको छ ।

यसैबीच कोषले पर्यटकलाई आकर्षित गर्न अब हरेक महिनाको पहिलो दिन सङ्गीत सन्ध्या आयोजना गर्ने भएको छ । सङ्गीत सन्ध्याका माध्यमबाट नेपालको मौलिक संस्कृति पर्यटकलाई जानकारी गराउने लक्षय रहेको कोषका प्रशासकीय अधिकृत गौरीशङ्कर पराजुलीले जानकारी दिनु भयो । 

अन्तिम अपडेट: फागुन ६, २०७६

तपाईको प्रतिक्रिया