रानीपोखरीको बालगोपालेश्वर मन्दिरमा गजुर राखिँदै

 असोज १५, २०७७ बिहिबार १०:२:३४ | उज्यालो सहकर्मी
unn.prixa.net

काठमाण्डाै - रानीपोखरीको बीचमा रहेको बालगोपालेश्वर मन्दिरमा आज गजुर प्रतिस्थापन गरिँदै छ ।

बालगोपालेश्वर मन्दिरमा अस्ति सोमबार गजुर प्रतिस्थापन गर्ने तयारी थियो, तर अन्तिम समयमा आएर बिहीबार बिहान राख्ने गरी स्थगित भएको थियो । प्राधिकरणका सम्पदा विज्ञ एवं रानीपोखरीको पुनर्निर्माणको काम हेर्दै आएका राजुमान मानन्धरका अनुसार आज गजुर प्रतिस्थापन भएसँगै आउँदो भाइटीकामा मन्दिर खुल्ने भएको छ ।

बालगोपालेश्वर मन्दिर हरेक वर्षको भाइटीकामा मात्रै खुल्ने परम्परा छ । तर, भूकम्पपछि भने खोलिएको थिएन । सीएम तुलसी कन्स्ट्रक्सन जेभीले बालगोपालेश्वर मन्दिर पुनर्निर्माणको काम गरेको हो ।

सीएम तुलसी कन्स्ट्रक्सन जेभीसँग गएको असार २४ गते मन्दिर, पुल र पोखरी बाहिरको काम गर्ने गरी १५ करोड रुपैयाँमा ठेक्का सम्झौता भएको थियो । पुनर्निर्माण भएको बालगोपालेश्वर मन्दिर ग्रन्थकुट (शिखर) शैलीमा बनेको छ ।

उपभोक्ता समितिले १० करोड र निर्माण व्यवसायीले १५ करोड गरी झण्डै २५ करोड रुपैयाँमा रानीपोखरी र बालगोपालेश्वर मन्दिरको पुनर्निर्माणको काम थालिएको थियो ।

अन्तिम अपडेट: असोज १६, २०७७

तपाईको प्रतिक्रिया