महोत्तरी – प्रदेश नं. २ का मुख्यमन्त्री लालबाबु राउतले ससर्त अनुदान सच्याउने प्रतिबद्धता जनाएपछि प्रदेश सभा बैठक सुरु भएको छ । बुधवार प्रदेश सभा बैठकलाई सम्बोधन गर्दै मुख्यमन्त्री राउतले पालिकालाई पठाएको ससर्त अनुदान सच्चाउने प्रतिबद्धता जनाएपछि बैठक सुरु भएको हो ।

पालिकालाई प्रदेश सरकारले पठाउने ससर्त अनुदानको विषयमा समिति बनाएर योजना छनोट गर्न सरकारले कार्यविधि बनाएर सांसदहरूबाट आएका योजना समावेश गर्ने प्रयास भए पनि भुलवश छुट्न गएको मुख्यमन्त्री राउतले स्वीकार गर्नुभयो ।

मुख्यमन्त्री राउतले जवाफ दिएपछि प्रदेश सभा बैठकमा विनियोजन विधेयक २०७८ को सिद्धान्त, उद्देश्य, प्राथमिकता तथा प्रमुख नीति सम्बन्धमा (कर प्रस्तावबाहेक) छलफल सुरु भएको थियो । त्यस्तै विधेयकमाथि सांसदहरूले उठाएको प्रश्नको जवाफ आर्थिक मामिला तथा योजना मन्त्री विजयकुमार यादवले दिनुभएको थियो ।

यसअघि मङ्गलवारको प्रदेश सभा बैठकमा विपक्षी दलहरू नेकपा एमाले, नेपाली कांग्रेस र नेकपा माओवादी केन्द्रका सांसदहरूले पालिकालाई पठाएको ससर्त अनुदान सांसदहरूसँग सल्लाह नै नगरि पठाएको भन्दै बैठकमा विराेध गरेका थिए ।  

भाेलि (बिहीवार) प्रदेश प्रमुख डा. राजेश झा अहिराजले प्रदेशसभामार्फत बजेटकाे नीति तथा कार्यक्रम प्रस्तुत गर्ने कार्यतालिका रहेको प्रदेश सभा सचिवालय स्रोतले जनाएको छ । 

प्रदेश २ सरकारको आ.व. २०७८/०७९ को नीति तथा कार्यक्रम भोलि दिउँसो ३ बजेको समयमा प्रदेश प्रमुख झाले प्रदेश सभामार्फत प्रस्तुत गर्नुहुने कार्यतालिका रहेको छ ।