थुनिएको राहुघाट नदी बग्न थाल्यो, जोखिम छैन तर सुरक्षा सतर्कता अपनाउनुपर्छ : प्रशासन

भदौ १०, २०७८ बिहीबार १६:४४:१० | प्रताप बानियाँ

म्याग्दी – लगातारको वर्षाका कारण पहिरो र ढुङ्गा खसेर थुनिएको म्याग्दीको राहुघाट नदी 'ओभरफ्लो' भएर बग्न थालेको छ । उत्तरी म्याग्दीको रघुगंगा गाउँपालिका ६ र ७ नम्बर वडाको सिमानामा पर्ने गौंडामुनि भन्ने ठाउँमा ढुङ्गा र पहिरो खसेर बिहीवार बिहानैदेखि थुनिएको राहुघाट नदी दिउँसोदेखि आफैँ 'ओभरफ्लो' भएर बग्न सुरु गरेको जिल्ला प्रहरी कार्यालय म्याग्दीले जनाएको छ ।

राहुघाट नदीभन्दा माथिबाट एउटा ठूलो ढुङ्गा र पहिरो खसेपछि झन्डै एक किलोमिटर लम्बाइ, १५ मिटर चौडाइ र १५ मिटर गहिराइको तलाउ बनेको भए पनि पानी 'ओभरफ्लो' भएर बग्न थालेको म्याग्दीका प्रमुख जिल्ला अधिकारी गणेशबहादुर अधिकारीले बताउनुभयो । उहाँले राहुघाट नदी आसपास नजिकै मानव बस्ती नभएको र तलाउबाट पानी बग्न थालेपछि जोखिम पनि कम रहेको बताउनुभयो ।

अहिले पनि सानो स्वरूपमा पहिरो खसिरहेकाले वर्षा भइरहेको खण्डमा तटीय क्षेत्रमा पुर्‍याउन सक्ने क्षतिलाई मध्यनजर गरी सुरक्षा सतर्कता अपनाउन आग्रह गरिएको प्रजिअ अधिकारीले जानकारी दिनुभयो । उहाँले थुनिएको राहुघाट नदी एकै पटक खोलिएको खण्डमा जिल्लाको गलेश्वर बजार, सदरमुकाम बेनीबजारसहित तटीय क्षेत्र जोखिममा पर्ने भएकाले पर्वतका सीडीओसँग पनि समन्वय गरिएको बताउनुभयो ।

नदी थुनिएको ठाउँ वरपरको क्षेत्र जलमग्न भएको स्थानीयवासीले बताएका छन् । वर्षा भइरहेको अवस्थामा थुनिएको राहुघाट नदीले असर पुर्‍याउन सक्ने भएकाले सतर्कता अपनाउन आग्रह गरिएको स्थानीय प्रशासनले जनाएको छ । थुनिएको राहुघाट नदीको अवस्थाबारे बुझ्न निर्माणाधीन राहुघाट जलविद्युत् आयोजनाको सुरक्षाका लागि खटिएका सुरक्षाकर्मीलाई परिचालन गरिएको छ ।

राहुघाट नदी पवित्र कालीगण्डकी नदीको सहायक नदी हो । म्याग्दीको बेनी नगरपालिका ९ गलेश्वर र रघुगंगा गाउँपालिका ३ राहुघाट क्षेत्रमा आएर राहुघाट नदी कालीगण्डकीमा मिसिन्छ । राहुघाटको तटीय क्षेत्रमा ४८ दशमलव ५ मेगावाट क्षमताको माथिल्लाे राहुघाट जलविद्युत् आयोजनाको विद्युत् गृह तथा ४० मेगावाट क्षमताको राहुघाट जलविद्युत् आयोजनाको बाँध निर्माणाधीन अवस्थामा रहेको छ ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्