काठमाण्डाै – प्रधानमन्त्री शेरबहादुर देउवाले बहुपक्षीय प्राविधिक तथा आर्थिक सहयोगका लागि बङ्गालको खाडी प्रयास (बिमस्टेक) क्षेत्रका चुनौती सम्बोधन गर्न सदस्य राष्ट्रहरूबीच एकता, ऐक्यबद्धता र सहकार्यको महत्त्वमा जोड दिनुभएको छ ।

बिमस्टेकको २५ औँ वार्षिकोत्सवको अवसरमा आज साेमवार शुभकामना दिँदै उहाँले यस क्षेत्रको आर्थिक साझेदारी प्रवर्द्धन गर्न एकता, ऐक्यबद्धता र सहकार्यको महत्त्वमा जोड दिनुभएको हो । प्रधानमन्त्री देउवाले बिमस्टेक सदस्य राष्ट्रका नागरिक र सरकारलाई शुभकामना दिँदै शान्ति, विकास र समृद्धिको क्षेत्रीय आकाङ्क्षा पूरा गर्न सङ्गठनलाई सक्षम बनाउनुपर्ने उल्लेख गर्नुभयो ।

उहाँले बिमस्टेकले दक्षिण एसिया र दक्षिण पूर्व एसियाबीचको सदियौँ पुरानो सांस्कृतिक र सभ्यताको सम्बन्धलाई पुनर्जीवित गरेको र सदस्य राष्ट्रबीच अर्थपूर्ण सहयोग अभिवृद्धि गर्न महत्त्वपूर्ण कदम चालेको बताउनुभएको छ । त्यस्तै बडापत्रमा हस्ताक्षर, महत्त्वपूर्ण कानुनी औजारको अवलम्बन, सहयोगका क्षेत्र र उपक्षेत्रहरूको पुनर्संरचनासहित पाँचौँ शिखर सम्मेलनले शान्ति, समृद्ध र दिगो बङ्गालको खाडी क्षेत्रका लागि सहकार्य र साझेदारीको स्पष्ट सन्देश दोहोर्‍याएको उहाँले उल्लेख गर्नुभएको छ ।

प्रधानमन्त्री देउवाले यी उपकरणहरूको समयबद्ध कार्यान्वयनले पक्कै पनि बिमस्टेक प्रक्रियालाई नयाँ गति दिने बताउनुभएको छ । त्यस्तै छुट्टै सन्देशमा परराष्ट्रमन्त्री डा. नारायण खड्काले बिमस्टेक प्रक्रियालाई पुनरुत्थान गर्न र यस वर्षलाई नयाँ सङ्कल्प, नतिजासहितको महत्त्वपूर्ण वार्षिकोत्सव बनाउन राजनीतिक इच्छाशक्तिको आवश्यकता रहेको बताउनुभएको छ ।

उहाँले सन् २०१८ मा काठमाण्डाैमा भएको चौथो शिखर सम्मेलनबाट सुरु भएको संस्थागत सुदृढीकरणको पहल भर्खरै कोलम्बोमा सम्पन्न पाँचौँ शिखर सम्मेलनमा परिणत भएको बताउँदै शान्ति र समृद्धिको साझा लक्ष्य हासिल गर्न बिमस्टेक सम्झौताको समयमै र प्रभावकारी कार्यान्वयन सुनिश्चित गर्नुपर्ने आवश्यकतामा जोड दिनुभयो । बिमस्टेकले सदस्य राष्ट्रहरूबीचको सहकार्यलाई सुदृढ गर्न थप फड्को मार्ने विश्वास व्यक्त गर्दै परराष्ट्रमन्त्री खड्काले क्षेत्रीय प्रक्रियामा रचनात्मक योगदान गर्ने नेपालको प्रतिबद्धता दोहोर्‍याउनुभयाे ।