यसअघि सुक्खाग्रस्त क्षेत्र बाँके नरैनापुरमा अहिलेको बाढीले २ सय घरमा क्षति

बाँके – बाँकेको नरैनापुर गाउँपालिकाको ६ वटै वडा बाढीले डुबानमा परेको छ । नरैनापुर गाँउपालिकामा दुई सय घरमा क्षति पुगेको छ भने एक हजारभन्दा धेरै बासिन्दा प्रत्यक्षरूपमा प्रभावित भएका गाउँपालिका विपद् शाखा प्रमुख तथा सूचना अधिकारी लक्ष्मीकान्त मिश्रले बताउनुभयो ।

उहाँका अनुसार वर्षाले नरैनापुरको वडा १, २, ३, ४, ५ र ६ का धेरैजसाे गाउँमा पानी पस्दा स्थानीयवासी प्रभावित भएका छन् । ६ वटै वडाका गाउँ जलमग्न भएका छन् । बाढी र डुबान पीडितका लागि तत्काल खाद्यान्न उपलब्ध गराउन जिल्ला विपद् व्यवस्थापन समितिलाई आग्रह गरिएको गाउँपालिका अध्यक्ष इश्तियाक अहमद शाहले बताउनुभयो । समयमा वर्षा नहुँदा सुक्खा क्षेत्र घोषणा गर्नुपरेको नरैनापुरमा अहिलेको बाढी, डुबान र कटानले क्षति गरेको छ ।

यसैबीच विगत तीन दिनदेखि परेको पानीका कारण सुर्खेतको वीरेन्द्रनगर उपत्यका तल्लो तटीय क्षेत्र डुबानमा परेको छ । वीरेन्द्रनगर नगरपालिका–९ को पर्सेनी, लबस्ता, तीलपुर, इटौरा, घोग्रेनीलगायतका क्षेत्र डुबानमा परेका हुन् ।

तल्लो क्षेत्र डुबानमा परेपछि स्थानीयवासी घर छोडेर सुरक्षित ठाउँमा लागेका छन् । धानबाली सबै बाढीले डुबाएको छ । डुबानले पाक्नै लागेको सबै धान नष्ट हुने चिन्ता रहेको स्थानीयवासीले बताएका छन् ।