सङ्खुवासभा प्रदेशसभा 'ख' मा एमालेका लिंथेप विजयी

सङ्खुवासभा – सङ्खुवासभा प्रदेशसभा ख मा नेकपा एमालेका विदुरकुमार लिंथेप निर्वाचित हुनु भएको छ ।  एमालेका लिंथेपले १५ हजार चार सय ८२ मत ल्याएर निर्वाचित हुनुभएको साहयक निर्वाचन अधिकृत डा इन्द्र सापकोटाले जानकारी दिनुभयो ।   

उहाँका निकटतम् प्रतिद्धन्द्धी नेकपा एकिकृत समाजवादीका सरिता खड्काले १५ हजार दुई सय ४२ मत ल्याउनुभएको छ । एमालेका लिंथेप दुई सय ४० मतान्तरले विजयी हुनुभएको हो । खड्का अघिल्लो चुनावमा एमालेबाट  समानुपातिकतर्फ प्रदेशसभा सदस्य बन्नुभएको थियो ।  

एमालेका लिंथेप २०७४ को पालिका तह चुनावमा मादी नगरपालिकाका प्रमुख हुनुभएको थियो । जिल्लामा प्रतिनिधिसभातर्फ एक र प्रदेशसभातर्फ दुई क्षेत्र रहेका छन् । जिल्लामा प्रतिनिधिसभातर्फ ६५ हजार तीन सय ३७ मत खसेको थियो । त्यसमा एक हजार ७२ मत बदर भएको थियो । पाँच गाउँपालिका र एक नगरपालिका रहेको प्रदेशसभा ख मा ३४ हजार मत खसेको थियो । प्रदेशसभा ख मा एक स्वतन्त्र सहित आठ जनाले उम्मेदवारी दिएका थिए ।