खाेटाङ : सडकको काम अलपत्र छाडेर हिँड्ने ठेकेदारकाे ग्रेडर मेसिन नियन्त्रणमा

 असोज २, २०८० मंगलबार ९:८:२५ | उज्यालो सहकर्मी
unn.prixa.net

खाेटाङ - खोटाङको दिक्तेल रुपाकोट मझुवागढी नगरपालिकाले सडक स्तरोन्नतिको काम अलपत्र छाडेर भाग्ने ठेकेदारको ग्रेडर मेसिन नियन्त्रणमा लिएको छ ।

दिक्तेल–खोटाङबजार सडक अन्तर्गत अस्पताल चोक–लफ्याङको दुबेचिवा (३ किलोमिटर) सडक स्तरोन्नतिको काम अलपत्र छाडेर हिँड्ने ढुकुछु/बगाले/बीएनटी जेभीको ग्रेडर नियन्त्रणमा लिएको हो ।

सडक स्तरोन्नतिको काम अलपत्र पारेर छाडेको केही समयपछि निर्माणस्थलबाट उठाएर भोजपुरतर्फ लैजाँदै गरेको अवस्थामा दिक्तेल रुपाकोट मझुवागढी नगरपालिका–५ नेर्पाको भुलभुलेमा पुर्‍याइएको ग्रेडर नियन्त्रणमा लिइएको नगरका प्रवक्ता दिनेश घिमिरेले बताउनुभयो । 

निर्माण कम्पनीका प्रतिनिधिले ‘मेसिन कन्डिसनमा भए/नभएको जाँच गर्न आएको’ भन्दै ग्रेडर स्टार्ट गरेर गुडाएका थिए । ठेकेदार सम्पर्कविहीन बनेको महिनौंँपछि मेसिन उठाएर हिँडाएपछि स्थानीयले नगरपालिकालाई खबर गरेका थिए । प्रहरीको टोलीसँग पछ्याउँदै जाँदा नभेटेपछि बाटोमा पर्ने प्रहरीचौकी दोर्पाचिउरीडाँडाका प्रहरीलाई परिचालन गरेर ग्रेडर नियन्त्रणमा लिएको प्रवक्ता घिमिरेले बताउनुभयो ।

नगरपालिकाले बाटैमा रोकेपछि ठेकेदारको प्रतिनिधिले ग्रेडरको पाङ्ग्राको हावा खुस्काएर हिँडेका पाइएको छ । ग्रेडर मेसिन छुटाउनका लागि राजनीतिक दबाब आइरहेको दिक्तेल रुपाकोट मझुवागढी नगरपालिकाका मेयर तीर्थराज भट्टराईले बताउनुभयो । 

भ्याटसहित ५ करोड ६ लाख ५५ हजार ५८६ रुपैयाँमा अस्पताल चोक–लफ्याङको दुबेचिवा सडक स्तरोन्नति गर्नेगरी ढुकुछु/बगाले/बिएनटीले ठेक्का लिएको हो । याे निर्माण कम्पनीले २०७९ पुस २८ गतेसम्ममा सम्पन्न गर्नेगरी २०७८ जेठ २० गते ठेक्का सम्झौता गरेको थियो ।

सडक स्तरोन्नतिको काम अलपत्र छाडेर हिँड्न लागेको अवस्थामा २०७९ कात्तिक २० गते नगरपालिकाले ढुकुछु/बगाले/बीएनटीको एउटा एक्स्काभेटर र एउटा व्याकहो लोडरमा ताला लगाएको थियो । मेसिनमा ताला लगाएको केही समयपछि काम सञ्चालन गराएको निर्माण व्यवसायीले पुःन काम अलपत्र बनाएका छन् । 

अन्तिम अपडेट: असार २६, २०८१

उज्यालोका खबर फेसबुक, इन्स्टाग्राम, एक्स ट्वीटरयूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया