साउनपछि अनुचित व्यापारिक क्रियाकलाप गर्ने सात कम्पनी तथा फर्म काठमाण्डौ महानगरको कारबाहीमा

कात्तिक २२, २०८० बुधबार ६:३२:२५ | उज्यालो सहकर्मी

काठमाण्डौ – काठमाण्डौ महानगरपालिकाले बितेको साढे तीन महिनामा अनुचित व्यापारिक क्रियाकलाप गर्ने व्यापारी तथा व्यवसायीहरुलाई नौ लाख ६० हजार रुपैयाँ जरिबाना तिराएको छ । खानेकुरामा स्वच्छताको पहलका लागि महानगरले शुरु गरेको अभियानमा चार महिनामा ७ वटा कम्पनी तथा फर्मलाई कारबाही गरेको महानगरको कृषि तथा पशुपन्क्षी विभागका प्रमुख एवम् खाद्य निरीक्षक डा अवधेश झाले जानकारी दिनुभयो ।

डा झाका अनुसार शिलबन्दी पानीमा कीरा र लेउ भेटिएपछि त्रिकोण वेभरेज इन्डष्ट्री (बालाजु) ले १ लाख रुपैयाँ जरिबाना तिरेको छ । यसैगरी पेय पदार्थमा ढुसी भेटिएपछि कालिञ्चोक ट्रेडिङ् नेपाल (पुतली सडक) ले १ लाख ५० हजार जरिबाना तिरेको छ । टिपटप समोसा पसलमा बिग्रिएको दूधवरी बिक्री गरेको अवस्थामा पाइएपछि २ लाख रुपैयाँ, बरुण वेभरेजलाई पेय पदार्थमा अखाद्य वस्तु भेट्टाएपछि २ लाख रुपैयाँ जरिबाना तिराइएको झाले बताउनुभयो ।

यस्तै भीम स्टोरलाई म्याद सकिएका बियर आपूर्ति गरेकोले २ लाख रुपैयाँ, भृकुटीमण्डपको पीजी खाजा घरलाई समोसामा साङ्ला भेटिएपछि १० हजार रुपैयाँ, र बुढानीलकण्ठको पशुपति स्प्रिङ् वाटरलाई खानेपानीमा कीरा र लार्भा भेटिएकोले १ लाख रुपैयाँ जरिबाना गरिएको हो ।

महानगरको अनुगमन टोलीले साउनदेखि अहिलेसम्ममा ४३ दिन अनुगमन गरेको अनुगमन टोलीका सम्पर्क व्यक्ति पुष्कर खड्काले जानकारी दिनुभयो । महानगरले अनुगमन सम्बन्धी जानकारी दिन आयोजना गरेको बैठकमा तिहारमा प्रयोग गरिने भाइ मसला, मिठाइ, फलफूल, जुसजस्ता खाद्य वस्तुमा हुन सक्ने मिसावट तथा अनुचित लाभ रोक्नु पर्नेमा जोड दिइएको थियो ।

कार्यक्रममा काठमाण्डौ महानगरपालिकाकी उपप्रमुख एवम् बजार व्यवस्थापन तथा उपभोक्ता हित संरक्षण समितिकी संयोजक सुनिता डंगोलले बजारमा अनुचित क्रियाकलाप गर्ने, मूल्य, गुणस्तर, नाप तौलमा उपभोक्तालाई ठगी गर्ने तथा कृतिम अभाव सिर्जना गर्ने व्यापारीलाई जरिबाना गर्नुपर्ने तर त्यसबेला कसुरका आधारमा कारबाही गर्नुपर्ने बताउनुभयो ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्