सर्लाही – सर्लाहीमा जिउँदो ब्राेइलर खुखुराको मूल्य घटेपछि कुखुरा पालक किसान समस्यामा परेका छन् ।

एक महिनादेखि जिउँदो ब्राेइलर कुखुराको मूल्य लगातार घटेकाले पोल्ट्रि व्यावसायीहरुको पेशा संकटमा परेको छ । अहिले जिउँदो ब्राेइलर कुखुराको मूल्य प्रति केजी १ सय ३५ रुपैयाँमा झरेपछि किसानलाई  लागत मूल्य उठाउन समस्या परेको हरिपुरका किसान हरि सापकोटाले गुनासो गर्नुभयो ।

महँगोमा चल्ला–दाना खरिद गरेर कुखुरा पालेका किसानले  भनेको जस्तो मूल्य नपाएपछि  पोल्ट्रि व्यावसाय नै छोडेको हजरियाका किसान देवेन्द्र रायले गुनासो गर्नुभयो । तीन महिनाअघि जिउँदै ब्राेइलर दुई सय  रुपैयाँसम्ममा बिक्री भएकोमा दसैँसँगै मूल्य घटेपछि पेशा नै संकट परेको किसानहरुको गुनासो छ ।

किसानले व्यापारीसँग चल्ल  प्रति गोटा ८०र८५ रुपैयाँ  र दान प्रति केजी ५८ रुपैयाँमा खरिद गर्ने गरेका छन । ४० देखि ४५ दिन ब्राेइलर कुखुरा पाल्दा  एउटा  ब्राेइलर कुखुरा बराबर दुई किलो ५०० ग्रामको कुखुरा उत्पादन हुने गरेको किसान बताउँछन् ।

४० दिनमा एउटा ब्राेइलर कुखुराले ४ किलो २०० ग्राम दाना खाने गरेको उनीहरुको भनाई छ । किसानलाई  दाना चल्ला औषधी र लागत मूल्य उठाउन  जिउँदो ब्राेइलर कुखुरा प्रति केजी १ सय ८० रुपैयाँभन्दा माथिमा बिक्री हुनु पर्ने किसानहरु बताउँछन् ।

व्यापारीहरुको एकाधिकारको  कारण पनि किसानले  कुखुराको मूल्य लिन नसकेका हुन् । ब्राेइलरको मूल्य घटेपछि  व्यापारी भनेको बेला कुखुरा नउठाउने गरेका कारण किसान झनै समस्यमा पर्ने गरेका छ ।

यति बेला सर्लाहीका  किसानको फर्ममा ३ किलोभन्दा माथिको तयारी कुखुरा छन् । कुखुराको मूल्य घटे पनि उपभोक्तले भने घटेको मूल्यमा मासु उपभोग गर्न पाएका छैनन् । अहिले जिउँदो ब्राेइलर कुखुराको मूल्य प्रतिकेजी ६५ रुपैयाँ र मासुको मूल्य केजीमा २० रुपैयाँ मात्र घटेको छ ।