काठमाण्डाै – तराई मधेशमा गर्मीसँगै तातो लहर अर्थात् (हिट वेभ) बढेको छ । आज तराई मधेशका आठ वटा जिल्लाका १० ठाउँको अधिकतम तापक्रम ४० डिग्री सेल्सियसभन्दा माथि पुगेको छ ।

मौसम पूर्वानुमान महाशाखाका अनुसार आज सिरहाको भगवानपुर, रुपन्देहीको तिलोत्तमा, लुम्बिनी, भैरहवा, कपिलवस्तुको तौलिहवा, पर्साको वीरगञ्ज, रौतहटको गौर, धनुषाको जनकपुर, सर्लाहीको मनुसमारा र नवलपरासी सुस्ता पश्चिमको सेमारीमा अधिकतम तापक्रम ४० डिग्री सेल्सियसभन्दा माथि पुगेको छ । सबैभन्दा धेरै वीरगञ्जमा अधिकतम तापक्रम ४१ डिग्री सेल्सियससम्म पुगेको छ । अरू धेरै ठाउँको अधिकतम तापक्रम पनि ४० डिग्रीकै हाराहारीमा छ ।

जल तथा मौसम विभागले तराई मधेशका जिल्लामा आजदेखि पाँच दिनसम्म अत्यधिक गर्मी र हिट वेभ अर्थात् तातो लहरको सम्भावना रहेको भन्दै सावधानी अपनाउन सचेत गराइसकेको छ ।

विभागले विशेष बुलेटिन निकालेर आजदेखि आउँदो २१ गतेसम्म पश्चिममा कञ्चनपुरदेखि पूर्वमा सप्तरीसम्म देशको दक्षिणी भागका जिल्लामा तातो हावा र तातो लहर (हिट बेभ) चल्न सक्ने चेतावनी दिएको हो । दक्षिणी भू–भागमा पर्ने चितवन र नवलपरासी पश्चिममा भने तातो लहरको जोखिम कम छ । भित्री मधेश तथा पूर्वी नेपालको दक्षिणी भागका जिल्लामा पनि अत्यधिक गर्मी हुने छ ।

प्रि–मनसुनमा लामो समय पानी नपरेका कारण गर्मी अत्यधिक बढेको हो । विभागले तातो हावा तथा तातो लहरबाट बच्न बढी गर्मीको समयमा घरभित्र अर्थात् चिसो ठाउँमा बस्न, बाहिरी वातावरणमा बढी नजान, घाममा बढी नदेखिन, हलुका र सुतीका लुगा लगाउन, बाहिर निस्कँदा टाउको छोप्न, टोपी लगाउन, नियमित र पटक–पटक पानी तथा झोल पदार्थ पिउन सुझाव दिएको छ ।