धनुषा – पढ्न नपाएको भन्दै जनकपुरधामको सबैभन्दा पुरानो शैक्षिक संस्था रामस्वरुप रामसागर बहुमुखी क्याम्पसमा विद्यार्थीहरुले तालाबन्दी गरेका छन् । 

क्याम्पसमा पढ्न आए पनि सधैँ त्यत्तिकै फर्कँदा आफूहरुको भविष्य नै धरापमा परेको भन्दै विद्यार्थीहरुले सोमबार क्याम्पस प्रमुखको कार्यकक्षमा तालाबन्दी गरेका हुन् ।

सार्वजनिक बिदाबाहेकको दिनमा पनि क्याम्पसमा प्राध्यापकहरु नआउने गरेका कारण आफूहरुलाई  त्यत्तिकै फर्किनुपर्ने समस्या ६ महिनादेखि रहेको विद्यार्थीहरुको गुनासो छ । विद्यार्थीहरुले क्याम्पसमा नियमित पठनपाठन हुनुपर्ने अथवा नभए लिएको पैसा फिर्ता गरेर अन्यन्त्रै पढ्न पाउनुपर्ने वातावरण मिलाइदिन माग गरेका छन् ।
 
यता क्याम्पसका सहायक प्रमुख रामनरेश ठाकुरले सम्बन्धित विषयको शिक्षक नभएकाले कक्षा सञ्चालन गर्न समस्या भएको बताउनुभयो ।