नक्कली बाबु बनाएर नागरिकताको सिफारिस गर्ने वडाध्यक्ष पक्राउ

जेठ ३०, २०७५ बुधबार २०:४३:५ | उज्यालो सहकर्मी

सिन्धुपाल्चोक – नक्कली बाबु खडा गरी नेपाली नागरिकता प्रमाण–पत्र सिफारिस गरेको आरोपमा हेलम्बु गाउँपालिका–६, का वडा अध्यक्ष खेतनाथ घिमिरे काठमाडौंबाट पक्राउ परेका छन् ।

मेलम्ची नगरपालिका–९, ज्यामिरेका खुसी तामाङको नक्कली बाबु बनाएर हेलम्बु गाउँपालिका–६, इचोकबाट नागरिकता सिफारिस गरेको आरोपमा घिमिरे काठमाडौंबाट पक्राउ परेका हुन् ।

आशाराम तामाङलाई नक्कली बाबु खडा गरेर खुसी तामाङलाई स्थानीय वडा अध्यक्ष घिमिरेले नागरिकता सिफारिस दिएको खुलेको छ ।

नागरिकता सिफरिसपछि आशाराम दाइ बनेरै खुसीको नागरिकता समेत बनाएको प्रहरीले जानकारी दिएको छ ।

नक्कली नागरिकता बनाएपछि उनीहरु दुवै जनालाई बौद्ध प्रहरीले पक्राउ गरेर सिन्धुपाल्चोकमा पठाएको जिल्ला प्रहरी कार्यालय सिन्धुपाल्चोकका प्रहरी प्रमुख एसपी मोहनप्रसाद पोखरेलले जानकारी दिनुभएको छ ।

खुसी तामाङको बाबुको नाम बिर्खबहादुर तामाङ हो, तर नागरिकतामा भने आशारामको बाबुको नाम वीरबहादुर राखेर नागरिकता लिएको खुलेको छ ।

जेठ ११ गते जिल्ला प्रशासन कार्यालय सिन्धुपाल्चोकबाट २४–०१–७५–०१०३५ नम्बरको नागरिकता प्रमाण–पत्र लिएर त्यही दिन नै राहदानीको सिफारिस समेत लिएको प्रहरीले जानकारी दिएको छ ।

खुसीले केन्द्रीय राहदानी विभागबाटै राहादानी समेत बनाइसकेको खुलेको छ ।

नक्कली दाइ बनेर नागरिकता सिफारिस गरेका आशारामको परिवारले आफ्नो परिवारको सदस्य भएर नागरिकता बनाएको थाहा पाएपछि बौद्ध प्रहरीलाई खबर गरेपछि प्रहरीले दुवैलाई नियन्त्रणमा लिएको थियो ।

ज्यामिरेकी महिलाले किन हेलम्बु गाउँपालिकाबाट नागरिकता लिइन् भन्ने चाहिँ गम्भीर विषय भएको प्रहरीले बताएको छ ।

‘अनुसन्धान सुरु गरेका छौँ,’ एसपी पोखरेलले बताउनुभएको छ ।

नक्कली दाइ बनेका आशाराम स्थानीय चुनावमा वडा अध्यक्ष घिमिरेका चालक रहेर काम गरेका थिए ।

लामो समय शिक्षण पेशामा आवद्ध घिमिरेले स्थानीय चुनावमा शिक्षकबाट राजीनामा दिएर वडा अध्यक्षमा नेपाली काँग्रेसबाट चुनावमा भाग लिएर विजयी भएका थिए ।

अन्तिम अपडेट: पुस ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्