धनुषा – प्रदेश २ का नेकपा प्रदेश सांसद किशोरी साह कमलले घरभाडा बापत लिएको रकम फिर्ता गर्ने भएका छन् ।

प्रदेश सांसद साहले प्रदेशसभा सचिवालयलाई बिहीबार एक पत्र पठाउँदै आफ्नो खातामा आएको तलबभत्ता रकमबाट फिर्ता अहिलेसम्मको सम्पूर्ण घरभाडा रकम फिर्ता लिन आग्रह गर्नुभएको हो ।

उहाँले आफ्नो घर जनकपुरमै रहेकाले अब उपरान्त घरभाडा सुविधा बापतको रकम आफ्नो खातामा नपठाउन समेत पत्रमा उल्लेख गर्नुभएको छ । प्रदेशको अस्थायी राजधानी जनकपुरमा घर हुँदाहुँदै प्रदेशसभा सचिवालयबाट घरभाडा बापत १४ जना रकम केही प्रदेश सांसदहरुले लिँदै आएको कुरा सार्वजनिक भएपछि उनीहरुको आलोचना हुँदै आएको छ ।

आलोचना हुन थालेपछि नेकपा सांसद साहले अहिलेसम्म लिएको सम्पूर्ण घरभाडा फिर्ता गर्ने  र अबदेखि उक्त सुविधा बापतको रकम नलिने बताउनुभएको हो ।संसदीय दलका नेता, सत्तापक्षका प्रमुख सचेतक, विपक्षी दलका प्रमुख सचेतक र संसदीय समितिका सभापतिलाई प्रदेशसभा सचिवालयले मासिक १८ हजार र सांसदहरूले घरभाडाबापत प्रतिमहिना १५ हजार रुपैयाँ पाउने व्यवस्था छ  ।

उहाँलगायत जनकपुरमै घर भएका प्रदेश सांसदले घरभाडा सुविधा बापतको रकम बुझ्दै आएका छन् ।