काठमाण्डाै - प्रदेश २ का मुख्यमन्त्री लालबाबु राउतले संघीय सरकारले ल्याएको प्रहरी परिचालन र आन्तरिक सुरक्षासम्बन्धी विधेयक मान्य नहुने चेतावनी दिनुभएको छ ।

संघीय सरकारले प्रमुख जिल्ला अधिकारीले नै प्रहरी परिचालन गर्नेगरी सो विधेयक ल्याएकोमा मुख्यमन्त्री राउतको आपत्ति छ । शनिबार काठमाण्डाैमा आयोजित साक्षात्कार कार्यक्रममा उहाँले प्रदेश सरकारसँग समानान्तर गतिविधि हुनेगरी संघीय सरकारले प्रमुख जिल्ला अधिकारमार्फत् शासन चलाउने कोशिस गरिरहेको भन्दै आक्रोश पनि व्यक्त गर्नुभयो ।

संविधान र प्रचलित कानुन विपरीत संघीयतालाई समाप्त पार्नेगरी आएको सो विधेयक प्रदेश २ को सरकारलाई स्वीकार्य नहुने मुख्यमन्त्री राउतको चेतावनी छ ।

मुख्यमन्त्री राउतले माघपछि जन्मने सबै बालिकाहरुलाई एक लाखको बीमा गरिदिने प्रदेश सरकारको योजना पनि सार्वजनिक गर्नुभयो । उहाँले बालिकाहरुलाई उचित शिक्षाको व्यवस्था गर्न पनि प्रदेश सरकारले भर्खर जन्मेका शिशुलाई बीमा गरिदिने योजना सार्वजनिक गरेको स्पष्ट पार्नुभयो ।

बीस वर्ष पूरा भएपछि झिक्ने व्यवस्थासहितको सो बीमाले २० वर्षअघि कम उमेरमै विवाह गर्ने सामाजिक कुरीतिको पनि अन्त्य हुने मुख्यमन्त्री राउतको विश्वास छ ।

फागुनको पहिलो साता सुरु हुने बीमा योजना यही माघपछि जन्मने बालिकाहरुलाई प्रदान गरिनेछ । पहिलो चरणमा प्रदेशभित्रका ८ वटै जिल्लाका २-२ वटा पालिकामा प्रारम्भ हुने कार्यक्रमको उद्घाटन राष्ट्रपति विद्या भण्डारीले गर्नुहुने पनि मुख्यमन्त्री राउतले जानकारी दिनु भयो ।

मुख्यमन्त्री राउतले स्रोत, साधन र कर्मचारीको अभावमा प्रदेश सरकारले सोचे अनुसार काम गर्न नसकेको गुनासो पनि गर्नुभयो ।