मोरङ – नेपाल–भारत सीमा क्षेत्र दशगजा क्षेत्रको अतिक्रमण हटाउन सुरु भएको छ । सशस्त्र सीमा सुरक्षा बल कार्यालय रानी र भारतीय सीमा सुरक्षा बल एसएसबीको संयुक्त सुरक्षा टोलीले जोगवनी र रानीबीचको दशगजा क्षेत्रको पसल तथा टहराहरु हटाइएको हो ।

प्रहरीको टोलीले जोगवनीको दशगजामा राखिएका ३९ वटा टहरा, पसल, हटाएको सशस्त्र प्रहरी सिमा सुरक्षा कार्यालयले जनाएको छ । सीमा क्षेत्रमा रहेका अन्य ८० ओटा घरहरु हटाउने तयारी भैरहेको र उनीहरुका लागि एक महिनाको समय दिइएको सशस्त्र प्रहरी उपरीक्षक मनिष थापाले जानकारी दिनुभयो ।

नेपाली र भारतीय दुवै पक्षले घर टहरा हटाउन थालेपछि उनीहरुले ५ महिनाको समय मागेका थिए । लामो समयदेखि बस्दै आएका उनीहरुलाई दुवै देशको सहमति अनुसार एक महिनाको समय दिइको एसपी थापाले जानकारी दिनुभयो ।

दशगजा क्षेत्रमा बस्ती बस्दा भारतीय तथा नपाली भूमिमा सुरक्षा खतरा हुने भन्दै दुवै देशका सुरक्षा अधिकारीहरु दशगजा खाली गराउन सहमत भएका हुन् ।

भारतको जोगवनीका नेता पप्पु पटेललाई अज्ञात व्यक्तिले गोली हानेपछि भारतीय पक्ष पनि दशगजा खाली गराउन सकारात्मक देखिएको अधिकारीहरुको भनाई छ । भारतीय पक्ष सकारात्मक भएपछि दशगजा खाली गराउन सफल भएको नेपाल पक्षको भनाई छ । यस अघि पटक–पटक नेपाल पक्षले दशगजाको बस्ती हटाउने प्रयास गरेको भए पनि भारतीय पक्षले आलटाल गर्दै आएको थियो ।