आईपीएल क्रिकेटमा आज कोलकोता र पञ्जाव खेल्दै
बैशाख १४, २०८१ शुक्रबार
काठमाण्डौ – पूर्व प्रधानमन्त्री र मन्त्रीहरुले चढ्दै आएको ८ वटा प्राडो सरकारको नाममा नरहेको पाइएको छ ।
नेपाल विद्युत प्राधिकरणको चमेलिया जलविद्युत आयोजनाले आफ्ना लागि खरिद गरेका ८ वटा प्राडोहरु पूर्व विशिष्टहरुले प्रयोगमा ल्याएका हुन् ।
आयोजनाको गाडी पूर्व विशिष्टहरुले प्रयोग गरेपछि त्यसलाई सरकारको नाममा ल्याउन भन्दै सरकारले ९ वर्ष अघि नै आयोजनालाई भुक्तानीसमेत गरिसकेको थियो । तर अझैसम्म पनि भुक्तानी भइसकेका गाडीहरु सरकारको नाममा ल्याउन नसकेको महालेखा परीक्षकको प्रतिवेदनमा उल्लेख छ ।
८ वटा गाडीमध्ये ३ वटा पूर्व प्रधानमन्त्री, एउटा पूर्व गृहमन्त्री, एउटा प्रधानमन्त्रीको सचिवालय र ३ वटा गृहमन्त्रालयले अहिले प्रयोग गरिरहेको छ । यस्तै बा ६ च १०२५ नम्बरको प्राडो जीपको बारेमा भने सरकारलाई कुनै जानकारी नरहेको गृह मन्त्रालयले जनाएको प्रतिवेदनमा उल्लेख छ ।
यसअघि गृहसचिव हुँदा मोहनकृष्ण सापकोटाले यो गाडी चढ्ने गर्नुभएको थियो । सापकोटा अहिले संस्कृति पर्यटन तथा नागरिक उडड्यन मन्त्रालयको सचिव हुनुहुन्छ । यसअघि पूर्व प्रधानमन्त्री शेरबहादुर देउवाले समेत त्यो गाडी चढ्नु भएको थियो । पछि उहाँले सरकारलाई फिर्ता गर्नु भएको थियो ।
तर अहिले यो गाडी कहाँ छ भन्ने कुरा नखुलेको महालेखा परीक्षकको कार्यालयले सार्वजनिक गरेको प्रतिवेदनमा उल्लेख छ ।