फ्रेन्च क्लब पेरिस सेन्ट जर्मेइन (पीएसजी) ले युभेन्टस तथा इटालीका पूर्व गोलरक्षक जियानलुइगी बुफोनलाई भित्र्याएको छ । 

४० वर्षीय बुफोनले यही सिजनमा युभेन्टस छोडेका थिए । उनले युभेन्टसबाट १७ वर्षमा ६ सय ५६ खेल खेलेका छन् । 

नौ पटक  सिरी ए जिताएका बुफोनलाई युभेन्टसले नै एक वर्षका लागि मैदान बाहिरको भूमिका सम्हाल्ने गरी सम्झौता गर्न लागिएको हल्ला थियो । तर बुफोनले भने फ्रेन्च क्लब पीएसजीसँग एक वर्षको लागि सम्झौता गरेका छन् । पीएसजीसँगको सम्झौतापछि उनले भने, ‘मलाई थाहा छ पीएसजीको सपना र उसका प्रशंसकका हृदयमा भएको कुरा ।’

‘मैले आफूमा भएको सबै उर्जालाई बाहिर ल्याउने छु, मेरो अनुभवले मेरो नयाँ क्लबलाई महत्वपूर्ण उपलब्धि हासिल गर्न सहयोग गर्नेछु’, बुफोनले भने । आफ्नो करियरमा पहिलो पटक देश छोड्दै गरेको बताउँदै बुफोनले महत्वाकांक्षी योजना भएकाले मात्रै पीएसजीको अफर स्वीकार गरेको बताएका छन् । 

बुफोन इटालीका लागि सबैभन्दा धेरै खेल खेल्ने खेलाडी पनि हुन् । उनले इटालीको राष्ट्रिय टोलीबाट १७६ खेल खेलेका छन् । इटाली विश्वकपमा छनोट हुन नसकेपछि उनले अन्तर्राष्ट्रिय फुटबलबाट सन्यास लिएका थिए । 

बुफोनले इटालीलाई सन् २००६ को विश्वकप जिताएका थिए । तर च्याम्पियन्स लिग जिताउन भने उनी असफल रहे । युभेन्टस सन् २००३ मा एसी मिलानसँग, २०१४ मा बार्सिलोनासँग र २०१७ मा रियल मड्रिडसँग च्याम्पियन्स लिगको फाइलमा पराजय हुन पुगेको थियो ।