लमजुङमा कृषि तथा पशु हाटबजार सञ्चालन

 असार २३, २०७५ शनिबार १८:४३:७ | श्यामशितल परियार

लमजुङ – घरगाउँमै उत्पादन गरेको तरकारीले बजार र उचित मूल्य नपाउँदा सुन्दरबजार–२, परेवाडाँडाकी किसान सुस्मिता खड्काको मन भतभती पोल्छ ।

श्रीमानसहित परिवारका अन्य सदस्यको साथमा परेवाडाँडामै बस्दै आउनुभएकी खड्काले डेढ रोपनी जग्गामा व्यावसायिक तरकारी खेती गर्नुभएको छ । अहिले उहाँको बारीमा खुर्सानी, लौका, गोलभेँडा बेच्नका लागि ठीक्क भएका छन् ।

 

विगतमा आफूले उत्पादन गरेका कृषिजन्य उत्पादनले बजार नपाउँदा उहाँलाई ‘खिन्न’ महसुस हुन्थ्यो । उहाँ तरकारी बिक्रीका लागि परेवाडाँडादेखी नजिकैको खत्रीठाँटीसम्म आउनुहुन्थ्यो । बिडम्बना तरकारीले बजार पाउँथेन । उपयुक्त मूल्यको त के कुरा गर्नु, कृषि उत्पादन नै बिक्री हुँदैन थियो ।

अहिले नजिकैको खत्रीठाँटी बजारमा कृषि तथा पशु हाटबजार सञ्चालनमा आएपछि आफूजस्तै धेरै किसानले उत्पादन गरेका कृषिजन्य उत्पादनले बजार र उचित मूल्य पाउनेमा सुस्मिता ढुक्क हुनुहुन्छ ।

‘गाउँघरमा तरकारी उत्पादन गरिन्छ । बजारमा ल्याउँदा उचित मूल्य पाइँदैन । कहिले त तरकारी बजारसम्म ल्याउन पनि सकिँदैन । त्यसैले दुःख गरी फलाएको तरकारी त्यसै खेर जान्थ्यो,’ उहाँले भन्नुभयो, ‘अब नजिकै खत्रीठाँटीमा कृषि तथा पशु हाटबजार सञ्चालन भएको छ । हामीजस्ता किसानले उत्पादन गरेका कृषि तथा पशुजन्य उत्पादनले बजार र उचित मूल्यमा पाउनेमा आशावादी छौँ । उत्पादित उपज बिक्री गरी हामीले हाम्रो आम्दानी बढाउने सक्नेछौँ भन्नेमा पनि आशावादी छौँ ।’

प्रत्येक साताको शुक्रबार हाटबजार  

शुक्रबार जिल्ला समन्वय समिति लमजुङका प्रमुख लोकराज पाण्डेले हाटबजारको उद्घाटन गर्नुभएको हो । हाटबजार सञ्चालनका लागि सुन्दरबजार नगरपालिकाले ७ स्टलसहितको एउटा ट्रष्ट पनि निर्माण गरिदिएको छ ।

 

ट्रष्ट निर्माण समितिका अध्यक्ष चित्रबहादुर केसीका अनुसार सुन्दरबजार नगरपालिकाको २ लाख ८० हजार, स्थानीयको जनश्रमदानबाट २८ हजार र थप २५ हजार गरी कुल ३ लाख ३३ हजार रुपैयाँमा हाटबजार सञ्चालनका लागि ट्रष्ट निर्माण गरिएको हो ।

सुन्दरबजार नगरपालिका–६, खत्रीठाँटीमा अबदेखी प्रत्येक साताको शुक्रबार कृषि तथा पशु हाटबजार सञ्चालन हुनेछ । किसानहरुले आफूले उत्पादन गरेका कृषि तथा पशुजन्य उत्पादन हाटबजारसम्म ल्याएर बिक्री गर्न सक्नेछन् । आम्दानी बढाउने सक्नेछन् । 

स्थानीय उत्पादनको बजारीकरणका लागि हाटबजार

सुन्दरबजार नगरपालिकाभित्र कुनै पनि हाटबजार नभएका कारण स्थानीय किसानले उत्पादन गरेका कृषि तथा पशुजन्य उत्पादनले बजार पाएन । ‘स्थानीय उत्पादनको बजारीकरण गर्ने हेतुले नै खत्रीठाँटीमा हाटबजार सञ्चालनमा ल्याईएको हो,’ हाटबजार व्यवस्थापन समितिका अध्यक्ष मानसिंह गुरुङले भन्नुभयो । हाटबजार सञ्चालनमा आउने भएसंगै स्थानीय व्यावसायिक किसानहरु हर्षित भएका छन् । 

‘कृषि तथा पशुजन्य उत्पादनले बजार नपाउँदा समस्या थियो । उत्पादित उपज कहाँ लगेर बेचौँ ? भन्ने चिन्ता थियो । अब नजिकै हाटबजार सञ्चालनमा आएको छ । आफ्नो कृषि तथा पशुजन्य उत्पादन बिक्रीका लागि अब भौतारिनु पर्दैन भन्ने हामीले विश्वास लिएका छौँ । किसानको हितलाई ध्यानमा राखी हाटबजार सञ्चालन गरिएको छ । यसमा हामी खुशी छौँ,’ व्यावसायिक रुपमा पराजुली बाख्रा फर्म सञ्चालन गर्दै आएका सुन्दरबजार नगरपालिका–६, का बाख्रापालक किसान कुलबहादुर पराजुलीले भन्नुभयो ।

हाटबजार सञ्चालनका लागि सुआहारा लमजुङले ५० हजार रुपैयाँ बराबरको सामाग्री प्रदान गरेको छ । सुआहारा लमजुङका संयोजक श्रीकृष्ण पौडेलका अनुसार हाटबजारलाई व्यवस्थित रुपमा सञ्चालनका लागि सुआहाराले टेबल तराजु ५ थान, क्रेट २० थान, त्रिपाल ५ थान र कुर्सी ७ थान उपलब्ध गराएको छ । 

सुन्दरबजारमा यसअघि पनि हाटबजार सञ्चालन गरिएको थियो । तर हाटबजारले निरन्तरता पाउन सकेन । बीचैमा हाटबजार बन्द भयो । खत्रीठाँटीमा सञ्चालित हाटबजारलाई भने निरन्तरता दिनुपर्नेमा सरोकारवालाहरुले जोड दिएका छन् ।    
 

अन्तिम अपडेट: पुस २, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

समाचार

लोकप्रिय

१

सालझण्डी–ढोरपाटन खण्डको काम १४ वर्षमा ३० प्रतिशत मात्र

२

जर्जियाको एक स्की रिसोर्टमा ११ जना भारतीय नागरिकसहित १२ जनाको शव भेटियो

३

रुसको राजधानी मस्कोमा भएको विस्फोटमा आणविक क्षेत्रका जनरलसहित दुई जनाको ज्यान गयो

४

इजरायलमा हाइपरसोनिक मिसाइल हानेको यमनको हुथी विद्रोहीको दाबी

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई