पर्सा – वीरगञ्जको गहवाका भिखारी रामको हत्यामा संलग्न तीन जनालाई प्रहरीले १५ दिनपछि पक्राउ गरी सार्वजनिक गरेको छ ।

पक्राउ पर्नेमा कलैया घरभई वीरगञ्ज बस्दै आएका ४० वर्षीय महजिद मिया हजाम, सर्लाही बरथवा १० का ४२ वर्षीय भरत थापा र पोखरा लेखनाथ नगरपालिका १ का २९ वर्षीय विजय नेपाली रहेको पर्साका प्रहरी उपरीक्षक रेवतीरमण घिमिरेले जानकारी दिनुभयो ।

वीरगञ्ज ८ गहवा निवासी पशुपति बैण्डका सञ्चालक समेत रहेका रामको गएको १० गते राति हत्या गरिएको अवस्थामा घर नजिकै नेपाल टेलीकमको पछाडिपट्टि रहेको सडकमा शव फेला परेको थियो ।

पक्राउ परेका तीनैजना अभियुक्त मध्ये अत्याधिक मादक पदार्थ सेवन गरेका महजिद मियाँ हजामले सामान्य विवादमा भिखारी रामको हत्या गरेको प्रहरी अनुसन्धानबाट खुलेको प्रहरी उपरीक्षक रेवती ढकालले जानकारी दिनुभयो ।

पक्राउ परेकालाई अदालतबाट म्याद थप गरेर अनुसन्धान भइरहेको प्रहरी उपरीक्षक ढकालले बताउनुभयो ।