काठमाडाैं - टिप्परले गर्दा दुर्घटना बढेपछि सरकारले काठमाडौँमा उपत्यकामा दिउँसो टिप्पर चलाउन रोक लगाएको छ । 

गृह मन्त्रालयले काठमाडौं, भक्तपुर र ललितपुरका प्रमुख जिल्ला अधिकारी र ट्राफिक प्रहरीलाई दिउँसो टिप्पर चलाउन पूर्ण रुपमा रोक लगाउन निर्देशन दिएको हो । 

अब साउन १ गतेदेखि राति ८ बजेदेखि बिहान ५ बजेसम्म मात्रै टिप्पर चलाउन पाइने गृह मन्त्रालयका प्रवक्ता रामकृष्ण सुवेदीले जानकारी दिनुभयो । 

महानगरीय ट्राफिक प्रहरी महाशाखाका अनुसार असार महिनामा काठमाडौँ उपत्यकामा १ सय ८ वटा दुर्घटना भएकामा ४० वटा दुर्घटना टिप्परले निम्त्याएका थिए ।
हिजो र केही दिन अघि काठमाडौंको जडिबुटीमा टिप्परले ठक्कर दिँदा दुई जनाको ज्यान गएपछि सरकारले दिउँसो टिप्पर चलाउन रोक लगाउने निर्णय गरेको हो ।