काठमाण्डौ – आन्तरिक विवादमा रुमल्लिएको मधेश केन्द्रित दल राष्ट्रिय जनता पार्टीको अध्यक्ष मण्डलको बैठक बसेको छ ।

शुक्रबार अपरान्ह पार्टी कार्यालय बबरमहलमा राष्ट्रिय जनता पार्टीको अध्यक्ष मण्डलको बैठक हालका संयोजक राजकिशोर यादवको अध्यक्षतामा बसेको हो । केही दिन अगाडि संयोजक यादवले पार्टीको राजनैतिक समितिको बैठक बोलाएपछि बाँकी नेता संयोजक यादवसँग रुष्ट बनेका थिए ।

संयोजक यादवले शुक्रबार (आज) र शनिबार दुई दिन राजनैतिक समितिको बैठक बोलाउनु भएको थियो । विभिन्न जिल्लामा रहेका राजनैतिक समितिका सदस्यहरु काठमाण्डौ आइसकेका छन् ।

अध्यक्ष मण्डलका अन्य सदस्यहरुसँग सल्लाह नै नगरी बैठक बोलाइएको भन्दै आलोचना भएपछि राजनैतिक समितिको बैठक मिति नतोकी सारिएको छ । अध्यक्ष मण्डलको बैठक माथिल्लो तलामा चलिरहेको बेला संयोजक यादव भने बैठकका लागि काठमाण्डौ आएका समिति सदस्यहरुलाई फकाउन अर्को कोठामा जानु परेको थियो ।

बैठकपछि सञ्चारकर्मीहरुको पार्टीको आन्तरिक विवादमा राखिएको जिज्ञाशामा अध्यक्ष मण्डलका संयोजक यादवले त्यस्तो केही नभएको मुद्दा र एजेन्डामा पार्टी एकढिक्का भएको प्रतिक्रिया दिनुभयो ।

राजपाभित्र अहिले समाजवादी पार्टीसँगको एकीकरण र पार्टीको महाधिवेशन गर्ने सम्बन्धमा स्पष्ट २ धार देखिएको छ । समाजवादी पार्टीसँग वार्ता गर्न बनेको समितिको संयोजक रहनु भएका राजेन्द्र महतो, वर्तमान संयोजक यादव र अध्यक्ष मण्डलका अर्का सदस्य महेन्द्र राय यादव तत्काल वार्ताको पक्षमा हुनुहुन्छ । बाँकी सदस्यहरु पार्टीको अधिवेशन गरेर मात्र औपचारिक प्रक्रिया सुरु गर्ने पक्षमा हुनुहुन्छ ।